Sa Malvasia primorosa de s'azienda F.lli Porcu de Mòdolo

Una binnenna fata a manu e unu traballu in cantina a puntinu pro un'istòria chi bit paris traditzione e innovatzione
21 Marzo 2020
flli porcu binos

Una bìngia coltivada feti cun àghina Malvasia e una terra de duos etaros in localidade Su e Giagu. Est su chi est serbidu a s'azienda F.lli Porcu pro cumentzare a produire binos in Mòdolo, biddighedda probiana a Bosa, in sa Pranarza.

Fiat su 1971. Don Giuseppe Porcu aiat comporadu terras egadas. Sos bisos suos fiant su de pastinare bides de Malvasia cun unu sistema de allevamentu a guyot e su de fàghere torrare a domo sos frades suos disterrados a Isvìtzera.

Sa de s'azienda F.lli Porcu est duncas un'istòria chi aunit sa traditzione de sa coltivatzione de sa Malvasia, chi at raighinas fortes in su territòriu, cun su disìgiu de innovatzione e sos balores de sa famìlia.

Est gosi ca in su 1975, a pustis de bator annos de traballu, Giuseppe, paris cun sos frades Giovanni e Angelino, cumentzat sa regorta de s'àghina cun sa primu binnenna.

Su 1977 est s'annu sinnadu dae sas primas ampuddas cun eticheta F.lli Porcu.

A pustis de unos cantos annos, s'azienda lòmpet a àere bator ètaros de terra coltivada feti a bides, ma sa cosa prus importante est ca dae su 1972 sa cantina de Mòdolo faghet parte de su “Albo D.O.C. dei vigneti” e at una produtzione de sessanta cuintales de binu pro onni ètaru de terra.

Sa binnenna si faghet a manu semper in su mese de cabidanne. Posca, su mùstiu, resurtu de sa catigadura, imbetzat pro duos annos intro carradas de castanza de treghentos litros.

Su produtu finale de custu traballu est unu binu bonu de sapore e de calidade manna meda.

malvasia porcu

Oe sa cantina F.lli Porcu produit tres bèvidas diferentes: su binu “Malvasia di Bosa – Riserva Secco”, una bèvida chi at unu sabore sicu e durche e ammentat su de sas mèndulas; su binu “Malvasia di Bosa – Dolce”, una bèvida a sabore de frùtora, elegante e fine meda, e su binu “Malvasia di Bosa – Amabile”, s'urtimu nàschidu dae sa passione de sa famìlia Porcu.

Unu binu bonu e una possidètzia ispantosa. Su sartu in ue sunt prantadas sas bìngias de sos frades Porcu est difatis unu logu bellu meda a lu bisitare. In prus de su paesàgiu “pintau” de sas bides, in Su e Giagu s'agatant una cantina meravizosa, unu fàbricu mannu treghentos metros cuadros, e una cresiedda cun òperas de arte de valore fata fraigare dae Don Giovanni Porcu.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento