Coronavirus: s'ITIS Othoca de Aristanis giait una manu a is alunnus suus

Cun s'agiudu de is Pompieris s'iscola industriali donat is pc cosa sua in comodatu a chini ndi tenit abisòngiu
2 Aprile 2020
ITIS Othoca

Cun s'apretu coronavirus s'est aberta s'eca de is letzionis in domu. Alunnus meda, perou, no tenint unu pc po podi assistiri a is fainas didàticas. Duncas, po agiudai is alunnus bisongiosus s'"Istituto Statale Othoca" de Aristanis at pentzau de donai in comodatu is pc impitaus in iscola. Funt 120 intre notebook e tablet is màchinas chi s'Istitutu at a imprestai a is istudiantis. A ddu fai isciri est stètiu su dirigenti Franco Frongia.

Is babus e is mamas de is alunnus interessaus a pigai in comodatu is dispositivus ant a depi fai domanda mandendi a s'indiritzu e-mail ortf02000d@istruzione.it su mòdulu chi s'agat in su giassu de s'iscola. In s'ogetu tocat a ponni “Richiesta assegnazione notebook/tablet in comodato d’uso – Alunno” (nòmini e sambenau).

A pustis de ai arriciu is domandas s'iscola at a pigai in cunsidèriu is Isee de is famìlias e at a fai una graduatòria. Is dispositivus ant essi intregaus de is Pompieris.

© RIPRODUZIONE RISERVATA