Denùntzia contra a sa Ras de is indipendentistas de Lìberu: est cumentzada s'afracada a is costeras

Cun sa delìbera 17/21 de 1 de su mesi de arbili sa Ras autorizat duus progetus presentaus de sa “Le Dune Service srl”
8 Aprile 2020
liberu

De tempus meda is diris de sa Sardigna e de su mundu intreu funt guvernadas de su coronavirus, una pesta chi tenit acapiada s'opinioni pùblica sighendi is acuntèssias de s'apretu.

“Mentras s'opinioni pùblica sighit cun pensamentu s'acuntèssia acapiada a sa podèmia, in Regioni si bivint momentus de trumbùliu po una lei urbanìstica chi si olit aprovai a sa marolla”. Est cantu denuntziat una nota de imprenta de is indipendentistas de Lìberu. “S'idea firma chi sa giunta Solinas tenit po su matoni – sighit su comunicau – est aici fuliosa chi, in custas diris, primu meda de arrennesci a fai una lei urbanìstica noa, sa Regioni, cun delìbera 17/21 de 1 de su mesi de arbili, at autorizau s'afracada a is costeras”. Sa referèntzia est a is duus progetus presentaus de sa sotziedadi “Le Dune Service srl”, est a nai su de Arbus e su de Castiadas.

Custus duus progetus, - acrarant is indipendentistas - “funt stètius aprovaus impari”, poita – si sighit - “comenti si ligit sa delìbera”: “essendo la proposta unitaria, la mancata realizzazione di uno dei due comporta la decadenza dell’altro e risulta ormai prossima la scadenza dei termini concessi per la realizzazione degli interventi”.

A faci de is firmas de sa vitzegovernadora Alessandra Zedda e de sa Dirigenti de sa presidèntzia Silvia Curto, is de Lìberu non bint craresa. Difatis sutalineant ca sa normalidadi iat a olli ca sa firma fessat stètia sa de Christian Solinas e sa de s'Assessori a s'Urbanìstica Quirico Sanna.

Ma sa cosa chi fait ponni a s'avèrtia is indipendentistas est sa motivatzioni donada, est a nai sa de “riconnosci s'interessu generali primàrgiu e sa rilevàntzia regionali”. “Nos pentzaus ca, in custu campu, s'interessu generali de is Sardus – pretzisant – siat su de amparai is costeras, su de non spaciai su territòriu, su de acastiai a unu paèsagiu ùnicu”.


 

© RIPRODUZIONE RISERVATA