Est cumentzada sa protesta de A Foras contra a s'ipserdìssiu de su dinai impitau po is esercitatzionis militaris

“+ OSPEDALI, - MILITARI/ Dotores pro curare EJA – Cannones pro gherrare NONO” funt is messàgius chi ant a arribai in dògnia furrungoni de sa Sardigna
15 Aprile 2020
a foras

A pustis de su comunicau de imprenta aundi A Foras - Contra a s'ocupatzione militare de sa Sardigna at denuntziau su cumentzu ufitziali, in su mesi de arbili de ocannu, de is esercitatzionis militaris in su Poligunu de Quirra e in Cabu Frasca, su 13 de arbili su muvimentu at comintzau sa spainadura de is messàgius chi pedint s'acabu de s'isperdìssiu de su dinai in esercitzionis de gherra. Sa proposta de su movimentu, perou, est prus cumprida: si pedit de torrai a donai su dinai chi si spendit cun is esercitatzionis a sa sanidadi pùblica sarda, chi po mori de iscèras polìticas malas est in d'unu istadu de dificultadi manna.

Sa mobilitatzioni si lamat “+ OSPEDALI, - MILITARI/ Dotores pro curare EJA – Cannones pro gherrare NONO”. Funt custus, difatis, is messàgius chi dognunu at a podi fai arribai in dògnia furrungoni de sa Sardigna. Ma comenti fai in custu momentu de inserru in domu? Is de A Foras ant pensau a diversas maneras po spainai is messàgius. Dognunu - si ligit in sa nota de imprenta - at a isceberai cussu chi bolit: si podit impitai unu lentzoru de ponni in su curridòriu o in sa màchina po fai ligi a totus su chi si pedit, si podit isceberai de ddu difùndiri scriendiddu in diversas partis de sa carena o de ddu fai connosciri atressu su social network Facebook, usendi su francubullu de atacai a s'avatar o ponendi in su muru de sa pàgini personali sa màgini cun su mesàgiu “Dotores pro curare EJA – Cannones pro gherrare NONO” aprontada de cussus de a Foras 'e totu.

© RIPRODUZIONE RISERVATA