A Foras: “Su coronavirus non frimat is esercitatzionis militaris”

In nd'unu momentu malu po sa sanidadi pùblica si spaciat su dinai cun is esercitatzionis militaris
6 Aprile 2020
passitzu aereu

De su 6 de arbili a su 9 de su mesi de làmpadas s'Aeronàutica aprofetat de sa frimada de su tràvigu aèreu po afortiai in s'ìsula is esercitatzionis militaris”. Est cantu denuntziant is de A Foras - Contra a s’ocupatzione militare de sa Sardigna in nd'una nota de imprenta chi fueddat de coronavirus, amentant sa crisi econòmica e sutalianeat puru is cunditzionis malas de sa sanidadi pùblica sarda.

Sa nova de is esercitatzionis, chi cun probabilidadi manna – pretzisat sa nota - “ant essi càrrigas meda”, tenit comenti fonti su giassu www.deskaeronautico.it. Is de A Foras, perou, no si funt frimaus e ant fatu àteras berìficas chi ant cunfirmau is scedas de su giassu de is pilotas de s'aviatzioni. Difatis, su giassu notaminfo.com puru donat is mantessi informatzionis.

Duncas, “de su 6 de arbili a su 9 de làmpadas, - sighit sa nota – po duus mesis e prus, po mori de is fainas militaris càrrigas, ant essi fatus tres passitzus aèreus chi pertocant su mantessi caminu ma tenint àltarias vàrias, e faint comunicai Su 'Poligono Interforze del Salto di Quirra' cun su 'Poligono di Capo Frasca'. Custus passitzus no funt cosa de dògnia diri, poita funt fatus prusatotu po esercitazionis mannas, comenti sa chi s'est tenta de su 13 a su 31 de su mesi de maju de su 2019 e chi est connota comenti Joint Stars. […] Totu custu acontessit candu s'ìsula est inserrada in domu po mori de s'apretu sanitàriu e candu is ispidalis nostrus tenint bisòngiu mannu de dinai”.

Si sa nova fessat cunfirmada” – pretzisat A Foras – po is sardus “iat essi un'ateru afrontu malu […] chi is Fotzas armadas italianas faint a Sardigna”.

© RIPRODUZIONE RISERVATA