Su progetu “Sos Makers pro sa Sanidade e sa Sardigna” produit amparus po sa faci de chini traballat in is ispidalis

Is primus milli amparus funt stètius giaus in dògnia provìntzia de Sardigna
14 Aprile 2020
makers pro sa sardigna

Fai is amparus po sa faci chi serbint a tutus is traballadoris in is ispidalis. Est custu s'iscopu de is “Makers pro sa Sardigna”, chi, de unus cantus cidas, po donai una manu de agiudu contra a s'apretu coronavirus ant cumentzau su progetu “Sos Makers pro sa Sanidade e sa Sardigna”. Is ùnicas cosas chi nci funt bòfias funt stètias una boluntati manna e is istampantis 3D.

Cun custas duas cosas is “Makers pro sa Sardigna” ant fatu retza criendi unu team mannu meda, unu grupu de personis chi tucat totus is provìntzias de s'ìsula cun sa punna ùnica de donai agiudu a chini, in is istruturas sanitàrias, si batit dògnia diri po binci sa batalla contra a su virus.

Gràtzias a sa ghia de “Sardegna Ricerche”, totus is makers donant una manu dògnia diri.

Is nòminis de chini at pigau parti a custu progetu funt medas. Intre custus ddoi at: Abinsula, FabLab Uniss, s'Universidadi de is Istùdius de Tàtari, S'Accademia “Mario Sironi” (ArtLab), S'AILUN/Simannu - Fab Lab Make in Nuoro, Eikon, FabLab Cagliari, FabLAB Sulcis, su Laboratorio K, FabLab Sassari, Sardegna 2050, Character, su Centro Servizi Computer, su SacerLab, GIUA Lab, Astarte, T-Lab Terralba e su Shadow Development.

Nòminis chi funt meda de prus, ma sa cosa de importu mannu, pròpiu in custas diris, est sa produtzioni e sa cumpartzidura de is primus milli amparus chi funt arribaus in dògnia furrungoni de sa Sardigna.

© RIPRODUZIONE RISERVATA