“Tenuta Asinara”: binos primorosos e poleddos biancos cun ogros de chelu

* Dae sa terra a sa butìllia * - Sa boluntade de fàghere espressare su territòriu de produtzione cun sas bides suas, sa de contribuire a bardare sos poleddos biancos de ratza sarda autòctona e su disìgiu de produire binos de primore sunt sos tres elementos a fundamentu de sa cantina “Tenuta Asinara”. Una realidade produtiva chi s'agatat in sa comuna de Sòssu, in sa regione de s'Anglona.

Cussa de sa “Tenuta Asinara” est un'istòria de amore e traballu remenosu, su de sa famìlia Sassu, chi sighinde s'annu agrìculu, connoschet momentos importantes, comente su de sa binnenna, chi in sas bìngias de custa azienda si faghet a mangianu chitzo, a manu e cun compidadas pretzisas.

Tocat a narrere puru ca pro carchi ratza de àghina sos de Sassu faghent s'arregorta a de note, cando sa temperadura prus frisca evitat chi sos frutos ammadrighent.

Sa cosa prus importante est però ca in sos sartos in ue sunt pastinadas sas bides de sa famìlia Sassu bivent sos poleddos biancos, chi cun sos ogros a colore de chelu sunt semper a costàgiu de sa coltivatzione in sas bìngias. Gosi, sos produtos de sa “Tenuta Asinara” sunt duos e sunt pretziosos: sos poleddos e sos binos, bèvidas ispantosas chi tocat a las tastare.

In unu logu chi paret unu Paradisu si coltivant Cannonau e Vermentinu, ma puru Cabernet Sauvignon, Cabernet Franc e Merlot. Sa produtzione est controllada a sa minuda, pro ite sos binos de sa famìlia Sassu naschent gosi: cun atentzione e incuru, isseberande feti sos mèngius budrones. Pro custa resone, intro de sa “Tenuta Asinara” un'allevamentu de boes remplasat s'impreu de contzimes chìmicos. Su rispetu pro sa natura est, difatis, un'àtera caraterìstica importante de custa realidade vitivinìcola.

In custa manera naschent sas etichetas de "Vermentino D.O.C.": su "Diffidente", s'"Indolente Bianco" e s'"Indolente Vintage", ampuddas chi costoint bèvidas estremadas.

S'ispantu arribat finas cando si tastant sos binos nieddos: sos "Cannonau D.O.C - Indolente Rosso", s'"Indolente Riserva" e su "Cayenna", o sos "IGT Isola dei Nuraghi", s'"Herculis" e s'"Hassan", ambos fatos cun àghina Grenache, Cabernet Sauvignon, Merlot e Cabernet Franc.

In sa proposta de sa "Tenuta Asinara" non podiant mancare unu Muscadellu de Sardigna, s'"Indolente Passito" e sos ispumantes puru: su "Birbante", su "Birbante Rosè" e su "Birbante Extra Dry".

Pro totu cussu chi amus contadu sos prèmios e sos arreconnoschimentos importantes otentos dae custa cantina non podent ispantare a nemos.