Unu tzicu dae su mundu brassìculu de "Hop Us Est"

Sas birras primorosas de unu birrifìtziu màstrinu surcitanu
22 Agosto 2020
hop up est

* Dae sa terra a sa butìllia * - Cun su primu prèmiu in sa categoria "Birras artesanales", in su 2019 est istadu su binchidore de s'Oscar delle Eccellenze Agroalimentari Sarde” in su “Sardinia Food Awards”. Si narat “Hop Us Est” e est unu birrifìtziu màstrinu de Crabònia. Su matessi chi, semper in su 2019, s'est classificadu segundu in sa categoria “Dubbel” e in sa categoria “Birre al Miele” de su “Best Italian Beer”.

“Hop Us Est” est una realidade brassìcola importante pro sa regione de su Surcis, in su cabu de giosso de Sardigna.

Su birrifìtziu produit cun passione sas birras suas e onni bèvida armonizat sa traditzione brassìcola cun sos produtos de su territòriu sardu.

Su nùmene de s'eticheta “Hop Us Est” naschet dae unu giogu de paràulas. “Hop” in limba inglesa cherret nàrrere lùpulu, duncas su marcu pigat su nùmene suo dae s'ingrediente chi, in prus de s'aroma e de sos nuscos, cunferit a sa birra su sabore marigosu chi la caraterizat.

Sas birras de custu birrifìtziu s'ispirant pro su prus a sa traditzione belga e britannica. Onni etichetta “Hop Us Est” - bisòngiat a lu sutalineare - est produida impreende feti produtos seletzionados cun atentzione. In prus, totus sas retzetas impitadas pro fàghere custas bèvidas sunt ligadas a istrintu a sos produtos de sa terra de Sardigna, comente sa saba de mùstiu de àghina Carignanu, su mele de cardu e su mele de arànzu.

Sas etichetas propostas sunt totus bèvidas sena coladas, chi non sunt nemmancu pastorizadas e chi torrant a buddire in intro de sas ampuddas.

“Acelia”, “Agape”, “Alba”, “Corvus”, “Grisù” e “Pulchra” sunt sas bèvidas chi agatamus in su catàlogu de custa bella realidade màstrina, chi faghet birras pro satisfàghere totus sas esigèntzias.

surcis

“Acelia”, pro esèmpiu, est una birra Amber Ale gluten free chi la podent bufare finas sos celiacos. Perfeta pro acumpangiare antipastos de petza, casu friscu e petza de cassa.

Cun 6,5 grados de alcol, s'“Agape” est una birra chi at nuscu de mele de arànzu. Òtima a la bufare cun petza bianca, tunina iscabeciada e durches.

Fata cun trigu, s'“Alba” est una bèvida trùbula interessante meda. Un'eticheta assuta in istile Bière Blanche chi tra sos ingredientes at su còrgiu de arànzu e coriandru.

Produida in istile Stout, sa “Corvus” est una birra carca, caraterizada dae su marigosu de sos lùpulus ingresos e de su trigu “black” (est a nàrrere nieddu).

"Grisù", imbetzes, est una Italian Grape Ale fata cun saba de mùstiu de àghina Carignanu. Una bella birra chi faeddat de Sardigna e chi ponet a notu comente si depet sos sabores sardos de su casu de berbeghe istasionadu e de sa petza arrustu.

In fines, pro sas retzetas chi ant unu sabore bellu forte, su birrifìtziu de Crabònia at creadu sa “Pulchra”, una birra in istile Dubbel cun 7,50 grados de alcol.

Onni eticheta produida dae custu birrifìtziu giòvanu est capassa de ispantare su paladu cun notas de sabore ùnicas.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento