“Vitivinicola Fulghesu Le Vigne”: ampuddas bellas a las bìdere e binos bonos a los bufare

* Dae sa terra a sa butìllia * - Sa “Vitivinicola Fulghesu Le Vigne” contat s'istòria de un'azienda vitivinìcola importante chi s'aunit cun s'istòria de una famìlia, sa de sos Fulghesu, chi dae annos meda traballant sas bìngias issoro cun passione e cumpetèntzia manna.

Fiant sos annos Trinta de su Noighentos cando, in sos sartos de Meana, biddighedda de sa Barbàgia de Brebì, sos Fulghesu comintzaiant a pastinare sas primas bìngias de custa azienda. Sas bides allevadas fiant sas ratzas Mandrolisai D.O.C.

In su 1969, a pustis de annos e annos de emigratzione, Nino Fulghesu aiat comporadu àteras terras in ue allevare bides. Gosi, su nùmeru de sas matas est crèschidu in pagu tempus.

Sas ratzas ischertadas fiant sas autòctonas, ratzas antigas comente sa Tintoria, chi faghet unu binu chi at unu colore ruju carcu, bellu meda a lu bìdere e non feti a lu bufare, s'aghina Barbera sarda e peri sas bides de Cannonau, de Muristellu e de Monica.

Sa punna de Nino fiat de produire binos a manera moderna, cun sos ogros punnados a su benidore. Bèvidas chi aiant una finalidade: sa valorizatzione de su terroir de su logu.

In die de oe custa realidade produtiva contat 10 ètaros de terrinos e sa ghia sua est sa fìgia de Nino, Maria Teresa, chi paris cun sa famìlia sighit passu passu su caminu giai sestadu dae su babbu. Custa pitzoca, difatis, rapresentat una cantina moderna meda, sa coltivatzione de sas bides est de tipu biològicu e sa regorta si faghet feti a manu. Custa azienda, difatis, abarrat ligada a istrintu a sa traditzione enològica sarda.

Su produtu de su traballu in su sartu e in cantina sunt su binu "Kantharu", s'"Ampsicora", su "Sentidu", su "Jolao", s'"Alinus", su "Zoli", s'"El Dorado", binos nieddos e biancos de primore.

Su "Kantharu" est unu nieddu “Mandrolisai D.O.C.” otentu dae àghina Cannonau, Muristellu e Monica, unu binu echilibradu chi at unu sabore bellu carcu. S'"Ampsicora" est unu Cannonau cun nuscos de mura e pruna, bonu a lu bufare cun màndigos tìpicos de sa traditzione sarda, mentres su binu "Sentidu" est unu Cagnulari nieddu, un'ampudda chi costoit una bèvida frisca e nuscosa. Su "Jolao - Rosso Superiore" est unu blend otentu dae àghina Cannonau e bides toscanas, unu nieddu chi at un'istrutura bona meda. In fines, sos tres biancos de Fulghesu sunt s'"Alinus", unu Vermentinu grogu chi acumpàngiat bene màndigos de pische; su "Zoli", unu Muscadellu a colore de oro, bèvida nuscosa e durche adata a la tastare paris cun durches de sa traditzione de s'ìsula; s'"El Dorado", un'àteru biancu elegante e durche chi at unu bellu colore de pinnadellu.

Ampuddas bellas a las bìdere chi sunt bardanas de binos saboridos. Onni eticheta Fulghesu est difatis un'iscoberta ispantosa.