“GreenMetric World University Ranking”: giudìtziu positivu po su traballu de S'Universidadi de is istùdius de Casteddu

S'impignu de s'Ateneu in matèria de isvilupu sustenìbili po lòmpiri a is obietivus de s' “Agenda 2030”
31 Dicembre 2020
terra

Terra - Una nova bona in Sardigna. S'Universidadi de Casteddu, difatis, est lòmpia a su nùmeru 300 in sa classìfica mundiali in matèria de sustenibilidadi “GreenMetric World University Ranking”; una classifica chi dda bit a su nùmeru 20 intre is universidadis italianas. Unu resurtu de importu chi tucat de un'atopu aprontau de s'Universidadi de s'Indonesia.

Po otèniri custus numerus si funt pigaus in cunsidèriu ses critèrius: Ambienti e infrastruturas; Energia e cambiamentu de su clima; Aliga, Àcua, Trasportus, Istrutzioni e circa.

terraCusta valutatzioni s'est sboddiada asuba de is datus arregortus de sa scuadra de s'Ateneu chi traballat po sa Retza de is Universidadis Sustenibilis, sa RUS. Faint parti de custu grupu: Italo Meloni, Sofia Cosentino, Aldo Muntoni, Antonio Pusceddu, Donatella Rita Petretto, Alfonso Damiano, Alessandra Carucci, Proretori po s'Internatzionalizatzioni, e Daniela Zedda, cordinadora de is polìtigas de sa sustenibilidadi de s'universidadi casteddaia. Su spricullitu at trisinau is diretzionis aministrativas e dògnia dipartimentu de s'Ateneu puru.

S'analizu de su resurtu ndi fait bessiri a pillu unu giuditziu positivu meda in matèria de àcua, istrutzioni e circa, e àliga, mentris at a tocai a traballai de prus in matèria de ambienti e infrastruturas, energia e cambiamentu de su clima e finas trasportus.

Funt frutus importantis, comenti at sutalineau Italo Meloni (Professori de su Dipartimentu de Ingegneria Tzivili, Ambientali e Architetura e Delegau de su Retori po sa Retza de is Universidadis Sustenibilis) a faci de Su Senatu academicu de s'Universidadi de Casteddu. “S'Ateneu - pretzisat Meloni - oi tenit sa capacidadi de cumprèndiri cali funt is elementus bonus e cali funt is criticidadis. Intzaras, po podi crèsciri e mellorai ancora tenit sa materia chi dd'at a permìtiri de assentai is cosas chi ancora no andant beni”.

 

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

 

© RIPRODUZIONE RISERVATA
Tags