Maristanis: su progetu chi difendit is areas ùmbidas de sa costera de su Gulfu de Aristanis

Unu progetu internatzionali chi pertocat 7705 ètarus de territoriu in is provintzias de Aristanis e de Casteddu
2 Gennaio 2021
terra

Terra - Su nòmini suu est Maristanis, est ghiau de sa “Fondazone MEDSEA” e est unu progetu internatzionali chi ponendi impari diversus sugetus tenit una punna feti: sa de difèndiri is areas ùmbidas de sa costera de su Golfu de Aristanis.

Innoi, difatis, Maristanis, chi andat ainnantis finas cun s'agiudu econòmicu de sa “Fondazione MAVA”, traballat po s'amparu de su Stàini de Sale ‘e Porcus, su de Mistras, su Stàini de Crabas, su su Stàini de Pauli Maiori, su de S’Ena Arrubia, is Stàinis de Corru S’Ittiri, Marceddì e San Giovanni. Cussus chi eus arremonau funt totus giassus Ramsar chi s'agatant in ùndixi comunus de is Provìntzias de Aristanis e Casteddu: Arborea; Arbus; Crabas, Gùspini, Nurachi; Aristanis, Prammas, Arriora, Santueru; Santa Iusta e Terraba.

maristanisCustus giassus tenint una mannària de 7705 ètarus e de Cabu Mannu arribant fintzas a sa laguna de Marceddì. Si definint comenti Ramsar poita respetant is critèrius istabbilius de sa Cunventzioni de Ramsar de su 1975, chi pertocat s'impreu sustenìbili de is areas ùmbidas.

Tocat a sutalineai ca cussas de su Gulfu de Aristanis funt zonas chi costoint territòrius de importu mannu, logus innoia s'agatant ratzas medas de animalis e de matas e chi rapresentant unu colu naturali importanti. In prus de custu s'atzioni insoru est fundamentali po abonazai su cambiamentu de su clima.

Po custas rexonis, duncas, custus 7705 ètarus de territoriu si depint difèndiri e netzessitant s'atentzioni nostra e prusatotu s'impignu de is comunus.

Unu de is iscopus de Maristanis est difatis su de pòniri manu a pranus profetosus de guvernu cun sa partetzipatzioni de is aministratzionis comunalis chi ant pigau parti a su progetu. Aici, su melloramentu de sa calidadi de s'àcua, s'impreu sustenibili de cust'elementu e s'irminorigamentu de s'impestadura atressu de atzionis sustenibilis funt tra is obietivus de Maristanis e ant a rapresentai puru una manera po difundiri su progetu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags