"Rete Ecoturismo Sardegna": 40 realidadis aunias de sa sustenibilidadi

Realidadis difarentis s'una de s'àtera chi resistint a su coronavirus
12 Gennaio 2021
terra

Nàscia in su 2019, sa “Rete Ecoturismo Sardegna” est su resurtu de un'idea de unus cantu personis chi traballant in su campu de su turismu. Su chi acomunat custus operadoris est ca totus tenint un'impignu: su de traballai a manera sustenìbili. Sa sustenibilidadi, difatis, est su valori chi tenit in pei custa retza.

In diri de oi su progetu ponit impari 40 realidadis. Funt tour operator, albergus, museus, ghias po fai escursionis e finas espertus chi aprontant esperièntzias noas.

Custu progetu creat is cunditzionis po fai connòsciri sa Sardigna atressu de circùitus difarentis e ddu fait amparendi is benis archeològicus e s'ambienti de s'ìsula e cun in conca una punna feti: sa sustenibilidadi econòmica e sotziali.

rete ecoturismo sardegnaComenti narat su nòmini suu, sa retza est ecosustenìbili, est a nai ca dògnia cosa fata de is sòtzius cosa sua est mòvia de s'idea de amenguai is efetus produtus in s'ambienti e frutendi intradas po s'economia de is comunidadis.

Andendi a lìgiri calencuna cosa in prus asuba de is sòtzius chi dd'ant pigau parti si cumprendit beni ca rapresentant realidadis difarentis meda s'una de s'àtera. Bisòngiat a nai, duncas, ca spriculendi su progetu agataus coperativas e asòtzius chi traballant po fai gitas e viàgius sustenìbilis. Seus chistionendi de "Sardinia Slow Experience", "Sardinia E-Motion", "Sardeo", "Soul Sardinia", "Arasolè" e àteras realidadis capassas de avalorai s'esperientzia de su viàgiu in Sardigna. In sa retza s'agatant fintzas aziendas de produtoris. Po fai calincunu esèmpiu, intre is sòtzius ddoi at sa “Società Agricola Soi”, una realidadi chi tenit sa domu sua in Nuragus e coltivat is bìngias respetendi sa massaria traditzionali, e sa "Cantina Olianas" de Xrexrei, un'azienda chi produit binus a manera ètica e biològica. Custu progetu ponit impari po finas albergus medas, aziendas de produtus biològicus cumenti "Tela Fertile" de Muristèni o coperativas chi guvernant sa gestioni de benis archeològicus. Tra is esèmpius chi si podint fai ddoi at sa coperativa "Nuova Luna" de Lanusè.

Sa “Rete Ecoturismo Sardegna” rapresentat un'esèmpiu virtuosu de proposta turìstica ètica e de calidadi, unu progetu chi est andau ainnantis finas in nd'unu perìodu crìticu comenti cussu de s'emergèntzia coronavirus.

Po ndi sciri de prus si podit incracai innoi.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags