S'azienda Marduk de Irgòli chi est una prenda de sa sustenibilidadi in Sardigna

Nàscia in su 2014, Marduk est istètia bincidora de s'“Oscar Green” de sa Coldiretti in su 2019
8 Gennaio 2021
terra

Su caminu de su progetu “Terra” sighit passu passu fueddendi finas de produtus sardus sustenìbilis. Oi, difatis, eus a presentai unu birrifìtziu mastrinu chi at fatu de sa sustenibilidadi sa bandera cosa sua.

Seus chistionendi de su Birrifìtziu Marduk, nàsciu in Irgòli de una idea de Mauro Loddo e Giuseppe Murru. Fiat su 2014 candu is duus maistus de sa birra cumentzànt s'aventura insoru. Oi is bèvidas produidas de Loddo e Murru funt famadas comenti birras agriculas centu po centu sardas e a km0.

Ma poita su de Marduk est unu birrifìtziu agrìculu? Poita fait birras pentzadas po ddas bufai impari a is àteras cosas produidas in s'azienda etotu.

Marduk at otentu puru sa tzertificatzioni biològica e fait parti de sa retza de “Campagna Amica” (Coldiretti).

mardukIn su mesi de cabudanni de su 2019 is duus piciocus ant bintu s' “Oscar Green” de sa Coldiretti in sa categoria “sustenibilidadi”. S'Oscar Green est su prèmiu promòviu de “Coldiretti Giovane Impresa” po promòviri su traballu de is giòvanus chi bint su benidori insoru in sa massaria e chi in custu traballu aunint traditzioni e innovatzioni.

S'azienda de Irgòli mandat ainnantis un'economia circulari. In is terras suas, difatis, si produint òrgiu e lùpulu, is matèrias primàrgias netzessàrias a fai is birras. S'òrgiu e su lùpulu passant primu in malteria, agoa si faint sicai, duncas si taballant po fai sa birra. Totu sa filiera si serrat cun sa produtzioni de sutaprodutus, produtzionis chi su birrifìtziu Marduk impitat po nudriai is bestias de s'allevamentu suu. Est unu resurtu de importu mannu, chi Mauro Loddo e Giuseppe Murru ant otentu a pustis de annus e annus de istùdius, cursus e circas.

Ma no est totu, poita bisòngiat a nai puru ca asumancu su 95 po centu de is matèrias primàrgias impitadas po fai is bèvidas Marduk si faint aintru de is terrinus de s'azienda irgolesa.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags