Borùta e sa produtzioni autònoma de currenti

Unu progetu sustenibili ativu de martzu 2021
2 Febbraio 2021
terra

Terra - Est autònoma po sa produtzioni de currenti e calincunu mesi fait nd'ant chistionau medas giornalis. Seus fueddendi de sa comunidadi de Borùta, biddixedda chi s'agatat in su Mejlogu a 40 chilòmitrus de Tàtari.

Sa nova pertocàt sa ditzisioni de su consillu comunali de andai ainnantis in nd'unu progetu sustenìbili. Unu progetu chi podit rapresentai un'esèmpiu po meda àterus comunus sardus.

Borùta, difatis, impari a àteras 11 comunidadis italianas est capassa de produiri a sola s'energia chi serbit a totus is tzitadinus cosa sua. Nau a manera difarenti, de su mesi de martzu 2021, in Borùta sa currenti at èssiri a indonu po tutus is borutesus, poita est su comunu etotu chi dd'at a produiri cun fontis renovàbilis.

Po cumprèndiri mellus su caminu de custu progetu depeus fai calincunu passu agoa. Su progetu, difatis, no est giòvunu giòvunu: est nàsciu in su 2012, candu su comunu etotu iat gherrau contra a su cumprimentu de unu parcu eòlicu, chi, comenti iat sutalineau su sìndigu de Borùta Silvano Arru, rapresentàt unu progetu dannosu po su territoriu, poita sa realizatzioni sua podiat destrossai su territoriu etotu.

De cussu momentu in Borùta s'est cumintzau a pentzai a unu progetu alternativu chi depiat donai sa possibbilidadi a totu sa comunidadi de èssiri autònoma po cantu pertocàt sa currenti. In su 2012 etotu su comunu de Borùta at adotau su Paes (Pianu de atzioni po s'energia sustenìbili) e at dèpiu bìnciri unu cantus impèigus primu de otèniri su resurtu isperau. Unu resurtu de importu non scéti po sa sustenibilidadi, ma po finas po afrontai un'àteru arragu malu chi tocat sa comunidadi de Borùta comenti àteras medas in Sardigna: sa genti si nc'andat de is biddas e in is comunidadis no abarrat prus nemus. Tocat a furriai custa impunnada e progetus chi donant atentzioni a sa capassidadi de produiri energia a solus podint donai una spinta po ddu fai.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags