In Casteddu sa butega "Naturalmente sostenibile"

Terra - Est sa primu butega sustenìbili in Sardigna e tenit domu in Casteddu, in arruga Pitzolo. Su nòmini cosa sua est "Naturalmente sostenibile" e si ligeus beni su chi iscriint in is pàginis de su giassu insoru est unu progetu chi tenit una punna de importu, sa de propòniri un'àtera manera de fai s'ispesa donendi unu messàgiu eticu.
Su messàgiu est ca totus depeus fai sa parti nostra po defèndiri s'ambienti. E difatis in sa butega casteddaja s'agatant feti cosas nàscias gràtzias a sa circa de produtus istudiaus e isceberaus cun incuru de is meris chi ddus bendint.

Is printzìpius de sa butega si fundant asuba de un'idea: sa de donai a sa genti sa possibbilidadi de connòsciri is produtus "low waste", est a nai mercis chi non podint impestai s'ambienti innoia biveus.

Po su prus seus chistionendi de refudus de pràstica. Custu materiali, difatis, est un'elementu periculosu po sa vida de sa terra e po cussa de is animalis chi bivint in s'àcua de su mari e de is rius puru.

Aici, intrendi in sa butega de arruga Pitzolo si podint comporai feti cosas de calidadi, produtus chi proponint un'"àteru" progetu de consumu.

Ma no est totu. Tocat po finas a sutalineai ca su traballu fatu de is meris de custa butega no est simpli po nudda, poita po podi donai vida a unu progetu cummenti cussu chi seus contendi oi est istètiu netzessàriu circai aziendas chi donant vida a produtus èticus e a manera ètica. Duncas seus chistionendi de aziendas chi sighint is mantessi printzìpius de "Naturalmente sostenibile".

Ma ita s'agatat in sa butega casteddaja de arruga Pitzolo? Po primu cosa ddoi funt mercis chentza de plàstica nudda; s'agatant produtus centu po centu sustenìbilis e mercis creadas a manera ètica. In prus de totu bisòngiat finas a aciungi ca dògnia cosa chi si comporat aintru de sa butega est fata feti cun elementus naturalis.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22