Deperu Holler: un'azienda chi fait binus naturalis

Terra - S'agatat in Boltizadas, si lamat Deperu Holler e est un'azienda chi produit binu a manera sustenìbili. Una realidadi produtiva de primori chi at regalau a sa Sardigna prèmius de importu mannu.

Nàscia in su 2007 de un'idea de su bingiateri e enòlogu sardu Carlo Deperu e de s'esperta in marketing e comunicatzioni Tatiana Holler, s'azienda gadduresa at puntau totu su traballu suu asuba de sa calidadi. ESt a nai: "pagu ma bonu".

Mancu a ddu nai, sa punna chi at mòviu is duus piciocus est de produiri binus sena de chìmica, bèvidas sustenìbilis e de sabori. Est po custa rexoni ca dògnia fundu de bide est traballau a manu cun respetu mannu.

Sa de Deperu Holler est una bìngia de ses ètarus e est sighia passu passu de Carlo e Tatiana.

Mancai s'iscera de non pigai nisciuna tzertificatzioni, su traballu in bìngia est unu traballu biològicu chi pigat in cunsidèriu mannu is matas, s'ambienti e is personis. No est po nudda ca is bidis funt acuadas feti candu sa mata abisòngiat diaderus de àcua, unu beni de valori chi tocat amparau.

Is etichetas Deperu Holler, duncas, funt binus de terroir fatus chentza s'impreu de sa chìmica e cun pagu àcua. Dògnia proposta, difatis, nascit in bìngia e agoa si mudat in sùciu in cantina. Su resurtu funt bevidas naturalis, fatas chentza de aciungi nudda. Binus sustenìbilis, duncas, chi costoint is nuscus e is saboris de sa Gaddura, terra de rocas, de mari e de bentu.

Deperu Holler est un'azienda ispantosa, impignada a fai connosciri una Sardigna chi tenit a coru is baloris de sa sustenibilidadi. Una realidadi produtiva chi avalorat s'ambienti e promovit su territòriu cun produtus sintzillus connotus finas foras de is lacanas de s'ìsula.

Is estichetas prospostas funt cuàturu: duus binus nieddus, est anai su Familia Isola dei Nuraghi IGT e s'Oberaia Isola dei Nuraghi IGT, e duus biancus, su Fria Vermentino di Sardegna DOC e su Prama Dorada Vermentino DOC.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22