NuAdventure: is viàgius sustenibilis chi ponint impari isport e natura
Terra – Est unu progetu de turismu sustenìbili in Sardigna chi ponit impari sa passioni po sa natura, s'amori po sa bellesa e cussa po is atividadis isportivas acapiadas a is cuatru elementus: s'àcua, sa terra, s'ària e su fogu.
Su nòmini suu est NuAdventure e est unu progetu chi nascit de sa conca de duas personis, Lohene e Fabrizio, chi candu si funt connotus ant iscobertu de bolli fai impari unu progetu de importu mannu po su mundu de sa sustenibilidadi in Sardigna.
Movimentu, isport, natura e respetu po s'ambienti funt is elementus primàrgius de su progetu NuAdventure. Unu progetu chi promovit su turismu isportivu a cuntatu cun sa natura, prusatotu cussu acapiau a s'ambienti de su mari.
Bisòngiat a nai chi in is programmas aprontaus de NuAdventure, perou, ddoi at pròpiu totu, po finas is programmas turìsticus chi valoritzat unus cantu logus de importu po sa cultura e is traditzionis sardas.
Sa punna prus manna de NuAdventure est sa de donai vida a viàgius ecosustenìbilis, esperièntzias ùnicas de fai in Sardigna in armonia cun sa natura. Nascint aici is caminus de fai feti a pei, is aventuras de fai in su mari cun is SUP o cussas de fai in ària atressu de su parapendiu.
Lohene e Fabrizio cuncodrant totu custu e meda àteru puru. Su yoga fatu in mesu a sa natura prus arga est un'esèmpiu de su chi seus contendi. Custa, difatis, est un'esperientzia chi torrat a donai paxi a is personis chi dda faint, e ddis torrat puru cuss'acàpiu cun sa natura chi eus pèrdiu po mori de una vida chi s'est fata lestra meda. Contra a custa lestresa NuAdventure proponit una manera de fai turismu difarenti: est unu turismu “slow” (est a nai lentu), unu turismu chi sighit is rìtimus de s'ambienti naturali.
Tocat a nai puru ca Fabrizio e Lohene pentzant diaderus a totu, e s'impignant a aprontai dògnia cosa chi podit serbiri po fai unu viàgiu sustenìbili. Est aici chi si dedicant po finas a is momentus de su prandi e sa cena. Cummenti ddu faint? Valoritzendi is produtus localis, comporendi de is pastoris e de is produtoris piticus, faendi papai a is turistas insoru su casu friscu e is licanias tìpicas de su logu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
