In Terranoa is mensas iscolàsticas funt "birdis"

S'isseberu sustenìbili de su Consillu Comunali est unu progetu de annestru ambientali
11 Febbraio 2021
terra

Terra - Sa nova est de pagu diris fait e portocat sa “furriada birdi e sustenìbili” bòfia de su Consillu Comunali de Terranoa po is mensas iscolàsticas.

S'isseberu est revolutzionàriu. Su comunu de Terranoa, difatis, nd'at bogau sa pràstica in totu is logus dedicaus a su bustu de is iscolas terranoesas.

Ma fadeus calencunu passixeddu agoa, poita sa ditzisioni de su Consillu Comunali de Terranoa est de calincunu mesi fait, candu, in su mesi de Onniasantu 2020, su Consillu etotu iat votau una variatzioni de su bilantzu cosa sua. Sa punna fiat sa de comporai frochitas, culleras, gorteddus, e finas pratus e tassas fatus cun materialis chi no impestant s'ambienti; totu cosas de impreai in is mensas iscolàsticas.

De una cida pagu prus o mancu su progetu est ativu in totu is iscolas comunalis de sa tzitadi gadduresa. Est a nai ca is mensas de Terranoa tenint su marcu “plastic free”. Po ddu nai cun àterus fueddus, custus funt logus lìbberus de sa pràstica.

sabrina serra“Bisòngiat a imparai a is piciocheddus s'arrespetu po s'ambienti”, at nau Sabrina Serra, s'assessora de s'Istrutzioni de su Comunu de Terranoa. Funt fueddus de importu, poita si faint cumprèndiri ca is valoris de is tzitadinus, cumenti s'arrespetu po s'ambienti innoia biveus totus, depit passai atressu de s'imparu iscolàsticu. Po custa rexoni, intzaras, s'assessora at puru pretzisau ca “Non fiat possìbbili andai ainnantis impitendi produtus chi impestànt su territòriu”.

Su progetu de su comunu gadduresu est duncas po primu cosa unu progetu de annestru ambientali chi tenit comenti protagonistas is piciocheddus. Funt issus, difatis, a depi podi fai esperièntzias diretas.

Aici, s'Assessora etotu at pigau parti a sa primu diri de is mensas iscolàsticas birdis. Dd'at fatu in sa mensa de s'iscola de Istachededdu impari a Simonetta Padre, Presidenti de sa Commissioni consiliari po s'Istrutzioni.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags