“Caseificio Todde”: un'esèmpiu importanti de silvopastoria
Terra - S'agatat in Dèsulu a 120 metrus de artària e fait casu a manera sustenìbili. Su nòmini suu est “Caseificio Todde”.
Todde est una realidadi produtiva chi nascit de un'istòria de amori, sa de Basilio Todde e Tommasina Floris.
Non fiant cojaus de meda candu, sighendi passu passu sa traditzioni sarda, is duus piciocus iant incumentzau a fai casu cun su lati de is crabitas insoru. Abellu abellu, sa chi fiat incumetzada comenti una produtzioni de casu po domu s'est mudada in nd'una faina po is àterus, est nai in nd'un'atividadi de bèndida.
Su casu fatu de Basilio e Tommasina est unu produtu licantzu chi praxit meda a sa genti de su logu. Difatis est pròpiu gràtzias a su cuntentu de sa genti chi is duus piciocus ant mudau sa faina insoru e e ant fatu nàsciri su “Caseificio Todde”.
Is annus passant e custa realidadi produtiva de primori est istètia ammanniada, rennoada e innovada cun su contributu de is fillus de Basilio e Tommasina: Fatima e Pietro. Ma una cosa feti non est mudada mai: su “Caseificio Todde” est sèmpiri un'azienda eco-sustenìbili, un'esèmpiu bellu de silvopastoria, pràtiga chi est capassa de ndi liai de s'àera cantidadis mannas de carbòniu agiudendi is padentis a abarrai sentzerus.
Cun 110 cabras de ratza Sarda, Saanen e Sardu-Maltesa chi in s'istiu pascint lìbberas in su buscu, is Tedde faint unu casu aromatu bonu meda. Su mèritu est de sa cosa de papai. Is bestias, difatis, papant castàngia arruta, landi, ceresia, leguminis e proenda genuina.
Totu su casu produidu de custu caseifitziu, in prus de èssiri fata cun lati de calidadi, est traballada a manera artesana.
Sa proposta de Todde est fata siat de casu tìpicu siat de produtos innovativus. Intre su casu traditzionali agataus su casu agedu, su casu de murgia, su casu de cabra e su de brebei, s'arrescotu friscu e cussu istajonau, mentris sa proposta innovativa est rapresentada de un'istrachinu de cabra saboriu meda.
A annoditai su “Caseificio Tedde” funt is formas de casu fatas cun lati cruu de brebei e de craba. Dògnia forma pesat 2,5 chilus e istajonat po tres mesis pagu prus o mancu aintru de aposentus naturalis chi s'agantant asuta de terra.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
