FarmAsinara: unu progetu sustenìbili chi rapresentat un'esèmpiu profetosu po àteras realidadis produtivas

Non feti produtus po sa bellesa ma labboratòrius didàticus puru
13 Marzo 2021
terra

Terra - FarmAsinara est una realidadi ispantosa chi nascit cun sa punna de pigai in cusidèriu s’Isula de s’Asinara cummenti campu de istùdiu de interessu po sa genia de matas e erbas medas chi s’agatant in s'Isula etotu. Cun sa ghia de su Dipartimentu de Chìmica de s’Universidadi de is Istùdius de Tàtari e de su Professori Giorgio Pintore chi traballat impari cun s’iscuadra cosa sua, FarmAsinara at creau unu progetu ecusustenìbili, prusatotu po sa manera de impreai is risorsas naturalis chi est fàtzili agatai in s’Isula.

terraA pustis de ai istudiau beni is erbas e is essèntzias de s’Isula, difatis, funt nàscius unus cantu produtus de bellesa cun marcu FarmAsinara. Funt produtus istudiaus e creaus aintru de su primu labboratòriu fundau de custa realidadi. Unu labboratòriu nàsciu cun sa partetzipatzioni de su Parcu Natzionali de s’Asinara e de s’Universidadi de Tàtari. Su nòmini suu est “FarmAsinara - Officine Cosmetiche dell’Asinara” e rapresentat su coru chi movit totu sa produtzioni mirifica de custu progetu sustenìbili. Unu progetu chi sighit aintru de is oficinas FarmAsinara, logus innoia si traballant is erbas, si ndi bogant is essèntzias e si andat ainnantis cun totu sa produtzioni, chi sighit fasas difarentis, e chi pertocat po finas s’aprontamentu de is botus innoia si ponint is produtus e s’apicigat s’eticheta.

Aintru de su labboratòriu s’aprontant labboratòrius didàticus puru e s’aghillint istudiantis universitàrius chi tenint aici sa possibbilidadi de otèniri CFU.

Totu su progetu postu in pei de FarmAsinara est un’esèmpiu de isvilupu sustenìbili, unu progetu chi de parti sua podit rapresentai un’esèmpiu profetosu po àteras realidadis produtivas.

Cust’eticheta produit 5 sabonis: cussu fatu cun s’ollu de olia, cussu fatu cun ollu de olia e lati de burrica, su saboni lìcuidu de ollu de olia e inifinis duus sabonis chi si lamant «Grecale» e funt unu tostau e unu lìcuidu. Impitendi erbas medicas chi crescint in s’Isula de s’Asinara, FarmAsinara fait finas unus cantu produtus de bellesa po sa faci e sa carena e produtus chi serbint po si fai sa braba. S’ùrtima novidadi est su gel de murta, chi serbit po si disinfetai is manus e est nàsciu po mori de sa pandemia causada de sa spainadura de su virus Covid-19.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags