"Pomona": unu progetu chi valorizat is ratzas de pira antiga

Lodè e sa sustenibilidadi in s'amparu de sa biodiversidadi
19 Marzo 2021
terra

Terra - Est finantziau de s'Assessoradu de sa defensa de s'ambiente de sa Regione Autònoma de Sardigna e si lamat “Pomona”. Seus fueddendi de unu progetu fatu de su “CEAS Montalbo” e de su Comunu de Lodè.

“Pomona” rapresentat unu labboratòriu de biodiversidadi, chi tenit sa punna de recuperai, amparai, valoritzai e fai connòsciri su patrimòniu genèticu de is ratzas antigas de sa pira allevada in su territòriu de Lodè.

Est aici ca su 14 de su mesi de martzu passau, in s'agriturismu “Su cunzatu de Vitale”, si funt innestas 17 ratzas de pira antiga. Custus innestus s'aciungint a is 13 giai postus a campu in mesis passus. A progetu concluidu ant èssiri prus 30 is ratzas de pira antiga recuperadas gràtzias a custa faina.

“Pomona” rapresentat un'esèmpiu importanti de economia e isvilupu sustenìbili. Unu progetu de fai connòsciri a mannus e pitius.

terraA su traballu de innestu ant pigau parti Guy D'Hallewin e Federico Sanna de su CNR de Tàtari; Melchiorre Pala de su “CFVA-Stazione di Lula”; s'Assesori de s'Agricolura de su Comunu de Lodè Samuele Serra; su de s'Ambienti Giovanni Canu e s'Assessora de Cultura e de s'Istrutzioni Loredana Calvisi.

A pustis de is innestus fatus in s'agriturismu “Su cunzatu de Vitale”, unus cantu isticus funt istètius donaus a is bardianus de sa biodiversidadi de su Comunu de Lodè. S'iscopu est de ddus fai innestai in is terras insoru.

Ma no est acabbada innoi, poita is traballus de su 14 de su mesi de martzu passau si funt cocluidus cun nd'unu momentu de importu mannu, candu Loredana Contu, sa meri de “Su cunzatu de Vitale” at ammostau a is chi ant pigau parti a s'atopu, ita totu si podit fai cun sa pira: licoris, marmelladas, frùtora sicada, e pimenta licorosa po cundiri drucis.

Pumona respetat cantu si ligit in sa lei chi amparat sa biodiversidadi (L.R. N° 16/2014).

A.C.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags