Cantina “La Contralta”: unu progetu èticu e sustenìbili

Sa cantina gadduresa no impitat produtus chi impestant sa terra
8 Aprile 2021
terra

Terra - Tenit domu in Terranoa e est una cantina giòvana chi traballat po unu progetu èticu e eco-sustenìbili. Su nòmini de custa realidadi produtiva est “La Contralta” e un'azienda chi allevat bìngias in su territòriu de su comunu de Lu Palau (in localidadi “Le Saline”) e in cussu de Lòiri-Poltu Santu Paulu (in sa localidadi de Enas).

Po coltivai is terrinus cosa insoru is meris de custa cantina gadduresa ant detzìdiu de no impreai mai produtus chi podint impestai is terras o fai mali a s'òmini, a is bèstias e a is matas. Po custa rexoni “la Coltralta” impitat feti contzimis naturalis e su metudu da luta biològica contra a is babbillotis dannosus po is matas e sa frùtora.

contraltaIn prus de totu su chi eus giai nau bisòngiat a sutalineai puru ca s'azienda gadduresa at isceberau de allevai feti ratzas de bidis autòctonas: su Vermentinu de Gaddura, su Cannonau e su Carignanu. A custa ratzas in su benidori s'ant a aciungi àteras ratzas autòctonas ma prus pagu famadas meda. Custu, difatis, est un'obietivu de importu de s'azienda, un'isceberu chi est testimònia de su rispetu ammostau de sa cantina gadduresa po is produtzionis tìpicas de su logu innoia nascint is binus chi produit.

Is etichetas “La Contralta” rapresentant su resurtu de unu traballu fatu cun bidis allevadas a sa sarda (cussas coltivadas in Lu Palau) o a spalliera (is fundus de Enas) in seti ètarus de terras; ma su chi est prus importanti est ca totu su traballu in bìngia e in cantina est unu traballu de tipu biològicu.

Po finas is etichetas de is ampuddas minescint calincunu fueddu, poita ddas at criadas s'archistar John Pawson, chi po ddas fai at pigau meledu de is òberas de Antine Nivola.

La Contralta” produit duas ampuddas: Su “Fiore del Sasso”, unu Vermentinu de Gaddura DOCG “Superiore” chi tenit unu colori grogu luxenti e unu sabori ecuilibbrau, e “L'Ora Grande”, unu Cannonau DOC, unu binu callenti a sabori de frùtora.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags