"Miss Trucco Green Ethic" e is produtus bio-sustenìbilis po sa faci
Terra - Su nòmini suu est “Miss Trucco Green Ethic” e est un'etichetta giòvana e sarda. Ddu ligeus po finas in su giassu internet cosa sua, aundi ddoi at iscritu ca totus is produtus “Miss Trucco” funt localis e eco-sustenìbilis.
Ma de ita seus chistionendi? Fueddaus de produtus de bellesa po sa faci e de ammanitzus ùtilis po puliri sa peddi de sa faci e de sa carena puru.
Su marcu “Miss Trucco” rapresentat prusatotu produtus chi chistionant de sa Sardigna, est a nai de su territoriu innoia s'agatant is matèrias primàrgias chi serbint a ddus fai.
Sa domu de custa realidadi produtiva, difatis, est sa tzitadi de Aristanis.
Sa meri de su marcu est una pitzoca chi si lamat Sara Mirai. Sara s'est laureada in biotecnologias industrialis e sigumenti est menosa a su prus de is produtus chi serbint a si trucai, at po primu cosa detzìdiu de pòniri in pei un'e-commerce (una butega online) po fai atopai sa genti chi bolit comporai produtus de bellesa biològicus e is aziendas chi ddus bendint.
Aici est nàsciu unu giassu chi si lamat “S'alchimissa”. Su nòmini sceberau est su de una erba linnosa e nuscosa meda. Un'erba chi s'agatat in in sartus nostrus.
Ma torrendi a “Miss Trucco Green Ethic” bisòngiat a pretzisai ca s'idea de Sara Mirai non s'est frimada e est andada ainnantis. Difatis, a pustis de sa butega online sa pitzoca at criau produtus de bellesa cun su marcu suu. Unu marcu chi nascit ponendi impari produtus delicaus po si ndi liai su trucu e ammanitzus po podi fai cust'operatzioni. Is primus impitant sa mendula, s'alchimissa e sa sàlvia; is segundus funt fatus cun seda, cotoni e bambù.
Dògnia produtu po ndi liai su trucu de sa peddi de sa faci est fatu cun su 97% de matèrias primàrgias naturalis.
Tocat a sutalineai ca su traballu fatu po criai is produtus “Miss Trucco Green Ethic” tenit artus is istandard chi pertocant a sa calidadi.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
