Nascint is botus fatus de is tapus de ortigu giai impitaus: su progetu sustenìbili de Giovanni Pasella

S'azienda Pasella est ativa de su 1974 e bolit fait viagiai un'arrogheddu de Sardigna in totu su mundu
15 Aprile 2021
terra

Terra - S'idea est sa de torrai a donai vida a is tapus de ortigu giai impitaus. Seus fueddendi de su progetu "Vero Sughero" chi est beniu in conca a Giovanni Pasella, su meri de s'“Azienda Artigianato Pasella”, chi de su 1974 fait istèrgius de artesanau, est a a nai cosas bellas de artesanau tìpicu sardu.

S'azienda de Giovanni Pasella s'agatat in Calanzànos, sa bidda in provìntzia de Tàtari chi est famada meda poita rapresentat unu tzentru de importu po su trabballamentu de s'ortigu.

Su progetu nou de Pasella partit de s'ortigu giai impitau po is tapus de binu e est unu progetu sustenìbili chi nascit comenti idea de produtzioni ecològica.

Ma comenti si podit aprontai unu sistema po torrai a impitai tapus bècius? Pasella tenit ideas ladinas. Difatis at pentzau de criai una retza de arregorta po is tapus de ortigu giai impitaus. Custus tapus etotu, a pustis de ddus ai regortus in unus cantus tzentrus de sa retza, ant a intrai in is fasas de trabballamentu de s'ortigu de s'“Azienda Artigianato Pasella”.

vero sugheroMa ita produtus at a fai Giovanni Pasella cun is tapus de ortigu regortus de sa retza? Sa respusta est simpli: Pasella at a fai botus chi s'ant a podi impitai po allogai sa cosa de papai e duncas ant a serbiri a is aziendas chi produint mandiaris. Seus fueddendi prusatotu de is realidadis chi faint meli, is chi faint marmelladas e cremas de casu. Ant a podi impitai is botus de ortigu fatus de Pasella po finas àteras realidadis produtivas. Po fai unu esèmpiu, custus botus de ortigu podint serbiri a is aziendas chi faint produtus po sa bellesa de sa carena e de sa faci. Est, po ddu nai a manera moderna, unu progetu de packaging abbissiosu, poita tenit sa punna de donai profetu a s'ambienti e de fai viagiai in giru po su mundu un'arrogheddu de Sardigna.

Giovanni Pasella, est cumbintu de s'importàntzia de su chi fait cun is tapus de ortigus bècius e tenit giai comporadoris de importu in Danimarca e in Dubai.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags