Sa sustenibilidadi ambientali in su progetu de su MEDCOASTLAB de s'Universidadi de Casteddu

A su progetu ant pigau parti istudiantis universitàrius e is piciocheddus de s'iscola media Colombo
13 Aprile 2021
terra

Terra - Ddas at ghiadas su Professori universitàriu Sandro Demuro impari a su grupu de circa MEDCOASTLAB de s'Universidadi de is Istùdius de Casteddu. Seus fueddendi de is fainas de sa de tres missionis de s'“Agenda 2030” de s'ONU chi s'est concluida de calincuna diri.

Is circadoris de su MEDCOASTLAB ant dedicau a sa sustenibilidadi ambientali is fainas de is obietivus 13, 14 e 15.

Is costeras e su mari funt istètius is logus innoia si funt cuncodraus is labboratòrius didàticus chi is circadoris etotu ant fatu impari a is piciocheddus de s'iscola media “Cristoforo Colombo” de Casteddu.

Is classis chi ant pigau parti a is fainas de su team de s'ateneu casteddaiu funt istètias sa II A, sa II E e sa III E. A acumpangiai is istudiantis ddoi fiant is professoressas Giuliana Camba, Venere Principale, Elisabetta Vignolo, Carla Monteforte e Marinella Piddiu.

unicaSa punna de su traballu fatu impari a su MEDCOASTLAB est istètia sa de fai cumprèndiri a is piciocheddus s'acapiòngiu forti intre sa vida de sa terra, sa de su mari e su cambiamentu de su clima. Un'arragu malu meda, chi est colligau cun s'impestadura de sa terra e de su mari, prusatotu cun s'impestu de sa plàstica, una chistioni chi tenit cummenti protagonista s'omini e is atzionis suas.

Gràtzias a is fainas fatas in su Poetu de Casteddu is piciocheddus de s'iscola “Cristoforo Colombo” ant pòtziu aprofundai su tema de sa “posidonia ocenaica”, una mata de importu chi serbit po amparai e po nudriai is arenàrgius. Is istudiantis de II A, sa II E e sa III E ant po finas presentau is traballus insoru a is àterus piciocheddus chi ant pigau parti a is atividadis de circa e istùdiu. Unu momentu importanti po fai cumprèndiri su valori artu de custu progetu fatu impari a s'Universidadi de Casteddu.

Is fainas de is circadoris de su MEDCOASTLAB funt sighias in s'universidadi etotu, cun is labboratòrius de is istudiantis universitàrius de “Geografia fisica” e de “Cartografia delle Scienze naturali e ambientali”.

 

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags