“Sardinian Green Synergy”: unu progetu colletivu e birdi

Is realidadis produtivas de “Sardinian Green Synergy” si funt fatas promovidoras e atuadoras de sa sustenibilidadi ambientali
10 Aprile 2021
terra

Terra - Si lamat “Sardinian Green Synergy” e est unu progetu colletivu chi ponit impari produtoris, serbìtzius, produtus e consumadoris. Ddu fait po promòviri unu mesàgiu sustenìbili. Funt unas cantu is aziendas chi pigant parti a custu progetu. Unu progetu chi afungat is rexinis suas in sa produtzioni birdi, est a nai “green”, a sa moda de is ingresus.

Nimancu a ddu nai: seus fueddendi de realidadis produtivas chi si funt fatas promovidoras e atuadoras de sa sustenibilidadi ambientali atressu de unu sistema econòmicu “naturali”: unu sistema chi amenguat s'àliga e chi est pentzau po podi afiantzai s'eco-sostenibilidadi cosa sua.

Sa de “Sardinian Green Synergy” est una filosofia de importu mannu po su benidori e is produtus e is serbìtzius chi oferrit funt acomunaus de su respetu po s'ambienti. Castiendi a sa saludi de sa terra, de sa domu e de s'òmini, su progetu proponit produtus bellus e chi valorizant is resursas.

Intre is atzionis chi agiudant s'ambienti agataus sa pràtica de torrai a impitai is refudus; sa produtzioni de benis chi non faint dannu ni a s'òmini ni a sa s'ambienti; sa promotzioni de unu turismu sustenìbili.

sardinian green synergyDògnia realidadi produtiva de “Sardinian Green Synergy” gherrat contra a s'impestadura ambientali, circhendi de impitai feti matèrias primàrgias de su territòriu isulanu. Est aici chi nascint is sabonis, is cremas, is ispòngias naturalis, is mòbilis fatus cun matèrias primàrgias naturalis e tzertificadas e su corredu biològicu fatu de is refudus de sa traballadura de sa lana sarda, de su cànniu e de sa roba chi non serbit prus e chi si podit impreai torra impreendi fantasia e abbilesa.

Non est totu, poita “Sardinian Green Synergy” proponit po finas esperièntzias de turismu sustenìbili, chi tenint comenti protagonistas agristurismus, hotel e b&b. Sa punna est de fàiri connòsciri a sa genti una Sardigna difarenti de sa chi faint connòsciri is depliant de biàgiu. Unu turismu alternativu chi est fatu aintru de sa natura, unu turismu fatu de nuscus e coloris.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags