Unu caminu longu chi at a portai a sa valorizatzioni de is areas ùmbidas de sa Provìntzia de Aristanis

Si funt ghetads is fundamentas de unu progetu ecològicu e sustenìbili
17 Aprile 2021
terra

Terra - Rapresentat unu progetu sustenìbili de importu mannu po unus cantu comunus de sa provìntzia de Aristanis e po totu sa Sardigna. S'idea chi ddu fundat pertocat sa tutela de is areas ùmbidas chi s'agatant a faci de su Gulfu de Aristanis. Seus chistionendi de su cuntratu po sa valorizatzioni de is territòrius naturalis de is costeras de sa provìntzia aristanesa, est a nai de un'acòrdiu chi tenit comenti protagonistas 10 comunus: su comunu de Crabas, su de Terraba, su comunu de Arbus, su de Arborea, su comunu de Gùspini, su comunu de Aristanis, su de Prammas, su de Arriora, is comunus de Santeru e de Santa Justa.

Un'acòrdiu importanti po is sìndigus de custas amministratzionis, ma po finas po s'Assessori de sa Defensa de s'Ambienti Gianni Lampis, po su rapresentanti de sa Pròvintzia de Aristanis Massimo Torrente e po finas po su Presidenti de su “Consorzio di Bonifica di Oristano” Carlo Corrias.

terraA pustis de unu caminu e incolliosu longu, difatis, is rapresentantis polìticus chi eus nomenau ant potziu firmai su cuntratu po sa valorizatzioni de is territorius naturalis de is costeras de sa provìntzia e ant criau is cunditzionis po ponni in pei unu progetu sustenìbili. Unu progetu chi tenit conca e peis in Sardigna e chi podit criai richesa cun is bellesas naturalis e ambientalis chi s'agantant in domu nosta etotu.

Aici, cun s'agiudu de sa Fondazione Medsea, is amministradoris e is rapresentantis polìticus ant fissau unus cantu obietivus e unus cantu progetus de fai in is annus chi benint.

Cun sa firma de su cuntratu s'est nomenau puru su cordinadori de su “Gruppo di Coordinamento”: est su Sìndigu de Terraba Sandro Pili. Pròpiu Pili at sutalineau ca sa firma de s'acòrdiu tra comunus, Assessorau, Provìntzia e “Consorzio” de bonifica est unu momentu chi donat fundamentas a unu caminu difìtzili ma importanti po sa tutela de s'ambienti.

Est una luta po s'ecologia, chi pertocat sa pisca, s'ambienti e su turismu puru, at pretzisau su sìndigu de Crabas Andrea Abis.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags