Ambienti e innovatzioni digitali: s'atopu de s'Ucsi asuba de sa sustenibilidadi

Su disafiu de s'ecològia e su cambiamentu de su modellu de isvilupu
22 Maggio 2021
terra

Terra - Comenti tìtulu fait "La sostenibilità ambientale, le sfide della transizione ecologica, il cambiamento del modello di sviluppo e dell'innovazione digitale", e est un'atopu on-line aprontau de s'Ucsi Sardigna (Ucsi est sa sigla de Unione Cattolica Stampa Italiana ndr) cun sa punna de chistionai de sustenibilidadi. S'atopu, chi s'at a sboddiai sàbudu 22 de su mesi de maju de is 09.30 a is 11.00, at a tocai argumentus chi funt de importu mannu po su benidori.

sustenibilidadiS'apuntamentu sardu de s'Ucsi est istètiu pentzau sighendi sa diretiva de sa 49ª Cida Sotziali de is Catòlicus Italianus, chi est intitulada "Il pianeta che speriamo. Ambiente, lavoro, futuro". S'atopu, chi s'at a tenni de su 21 a su 24 de su mesi de ladàminis chi benit in sa tzitadi de Tarantu, tenit s'obietivu de arremaciai su chi at nau bortas meda po finas Papa Francesco. "Totu - at nau su Papa - est connessu. Si s'òmini si declarat autònomu de sa realidadi e si fait a dominadori supremu, sa mantessi basi de s'esistèntzia sua si spimpiridat", poita "imbecis de sboddiai unu ruolu de collaboradori de s'òpera de sa creatzioni, s'òmini si fait Deus e dd'acabat po causai sa rebellia de sa natura".

Su respetu de sa natura donat saludi a s'òmini. Po donai respetu a sa natura, perou, tocat a incarrerai un'àndala chi tengat comenti ghia totus is obietivus de sa sustenibilidadi. Funt is obietivus chi s'agatant in s'”Agenda 2030”, e chi duncas pigant in cunsidèriu su campu econòmicu, su sotziali e s'ecològicu puru.

Po s'atopu on-line de sàbudu 22, atressu de sa piataforma Zoom e atressu de sa pàgini Facebook de s'Ucsi Sardigna, ant a fueddai sa vaticanista de su Tg3 e presidenti natzionali de s'Ucsi Vania De Luca, Giuseppe Notarstefano, membru de su Cumitau issentìficu de sa 49ª Cida sotziali de is catòlicus italianus, su presidenti de s'Isde Sardigna (Isde est sa sigla de “International Society of Doctors for the Environment”) Domenico Scanu e unu membru de su "The economy of Francesco" Maurizio Pitzolu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags