Su Grig, “Gruppo di Intervento Giuridico”, oberrit unu fronti de luta po difèndiri su Poetu
Terra - Sighit a fai chistionai desei sa gestioni de sa praja de su Poetu, 8 o 9 chilòmetrus de arenàrgiu pagu prus o mancu chi de Casteddu arribbant a su territòriu de Cuartu Sant'Alèni.
Ddu scideus giai: de annus meda in su Poetu ddoi funt istètius prus arragus chi non momentus de glòria. Oi, perou, a chistionai de sa praja chi est in su coru de is casteddajus est su Grig, est a nai su “Gruppo di Intervento Giuridico”, chi est un'assòtziu de impignu in su campu de s'ecològia e de sa sustenibilidadi ambientali nàsciu in Casteddu in su 1992 e famau meda po is batallas chi de sèmpiri mandat ainnantis. De candu est cumentzau su caminu suu, difatis, su Grig at fatu milla e milla batallas po defèndiri s'ambienti in Sardigna.
A pustis de ai donau giudìtzius negativus a sa gestioni chi pertocat a su Poetu, de is pàginis de su blog cosa sua su Grig at obertu un'àteru fronti de luta, cussu chi pertocat sa bonìfica de is sacus de nylon chi s'agatant in s'arenàrgiu de su Poetu.
Ma de ita seus chistionendi? Seus fueddendi de is sacus de nylon chi de calincunu mesi si podiant biri sa praja: ddus iant postus, prenus de arena, cun su permissu de sa Regione Autònoma de Sardigna. Serbiant a proibbiri a is undas chi arribbant fintzas a s'arenàrgiu de ndi liai s'arena de sa lìnia de sa costera.
E intzaras poita su Grig in diri de oi batallat contra a custus sacus? Poita, pròpiu oi cussu sacus non funt prus cumpatìbbilis cun su rispetu de s'ambienti. Custus aparìcius, difatis, oi s'agatant in istadu de degradu. Fuliaus in sa praja, custus funt feti aliga chi in prus de imbrutai podit èssiri po finas meda perigulosa po s'ambienti. Is ambientalistas nomenant prusatotu is sacus chi s'agatant in s'area de su Lido.
Aici, cun nd'unu documentu de su 16 de martzu de su 2021, su Grig at pediu oberas de bonìfica ambientali po totu sa praja. Su “Servizio Demanio” de sa “Capitaneria di Porto” de Casteddu, cun sa nota 2688 de su 24 de martzu 2021 at donau is arrespustas suas pretzisendi ca at èssiri tzerriada una cuferèntzia de is serbìtzius chi at a detzidiri is bonìficas de fai.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
