MEDISS: unu progetu sustenìbili chi ponit impari unas cantu realidadis

Terra - Dd'ant presentau oi, 24 de su mesi de làmpadas de su 2021, in sa domu de sa “Cooperativa Produttori” de Arborea. Seus fueddendi de su progetu-pilota MEDISS, chi si movit aintru de su “Programma di cooperazione transfrontaliera 2014-2020 ENI CBC”. Unu programma chi tenit unu nòmini ingresu e difatis dd'ant batiau “Mediterranean Sea Basin Programme”.

Ma de ita seus chistionendi candu fueddaus de MEDISS? Po primu cosa bisòngiat a sutalineai ca custu progetu ponit in pei un'impiantu po su “stripping” de s'ammoniaca. In àterus fueddus custu est unu progetu chi tenit sa punna de torrai a impitai is refudus produidus de is aziendas de allevamentu po ndi fai unu contzimi bellu e puliu. Unu progetu sustenìbili duncas, un'impiantu pentzau po respetai s'ambienti innoia biveus.

S'idea est simpli ma po dda fai nci bolint unas cantu personis chi scipant traballai beni impari sighendi su mantessi obbietivu. Aici est nàsciu unu grupu de circa chi gosat de una “partership”, o si ddu boleus nai a manera nosta podeus nai ca po mori de custu grupu est nàscia una collaboratzioni intre unas cantu realidadis de importu mannu. Funt s'ENAS e su CRENoS, chi funt ghiaus de Giovanni Sistu, professori de Giografia de is Resursas in sa Facultadi de Iscièntzias Polìticas. In prus, custas realidadis de circa tenint s'amparu de su Comunu de Arborea, de sa “Cooperativa Produttori” de Arborea e po finas de S'Agenzia LAORE de sa Regione Autònoma de Sardigna.

Fintzas a oi po ponni in pei custu progetu si funt impitadas tennicas modernas meda. Difatis in sa cuferèntzia de imprenta de oi est istètiu presentau s'impiantu-pilota impreau de sa “Cooperativa Produttori” de Arborea.

Ma poita chistionaus de unu progetu sustenìbili? Prusatotu poita s'impiantu MEDISS est nàsciu po afrontai po finas sa mancàntzia de àcua, un'arragu malu chi ferrit diversas zonas de produtzioni.

A ghiai is traballus po sa presentada de oi ddoi fiat Maria Antonietta Dessena de S'ENAS Sardegna.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22