“Bi.Ar Sardegna”: su progetu sustenìbili po fai birras mastrinas e propòniri unu modellu econòmicu nou

Sa punna est de fai birras torrendi a impitai is refudus de sa produtzioni
1 Luglio 2021
terra

Terra – Su nòmini cosa sua est “Bi.Ar Sardegna” e est unu progetu chi pertocat sa produtzioni sustenìbili de birra mastrina totu sarda. Custu bellu progetu ponit a campu unas cantu personis cun is cumpetèntzias e is intelligèntzias insoru. Funt circadoris chi faint parti de “Sardegna Ricerche”, s'enti de sa Regione Autònoma de Sardigna chi ghiat sa circa e s'isvilupu regionali sardu; de “Porto Conte Ricerche” de S'Alighera, àteru tzentru de circa de importu mannu in s'ìsula nostra; de sa “SOTACARBO s.p.a”, unu realidadi aziendali chi rapresentat unu tzentru de istudiu e isvilupu po s'energia sustenìbili chi tenit domu in Serbariu; de su Dipartimentu de Agrària de s'Universidadi de is Istùdius de Tàtari.

biarMa cali est sa punna de su progetu “Bi.Ar Sardegna”? S'obietivu prus generali – si ligit in su giassu de “Sardegna Ricerche” - est de contribbuiri a fai birras mastrinas sardas chi siant capassas de si fai una positzioni bella in su mercau e de dda mantènniri puru. Sa cosa prus importanti, perou, est ca custas produtzionis ant a depi propòniri unu modellu economicu nou e, prusatotu, ant a depi èssiri capassas de torrai a impitai is refudus de sa produtzioni mastrina po ndi fai energia pulia.

Totu custu at a permìtiri a is realidadis brassìcolas mastrinas chi tenint domu in Sardigna, e chi rapresentant giai etichetas cun marcus famaus, de podi produiri birras sustenìbilis, birras fatas cun màterias primàrgias de su logu, e, prusatotu, birras chi arrenexint a valorizai is refudus de sa produtzioni.

Bisòngiat po finas a pretzisai ca su progetu “Bi.Ar Sardegna” est unu progetu “cluster”, est a nai ca tenit is ennas obertas a is realidadis produtivas: si custas olint pigai parti a su “Bi.Ar” depint feti imbiai s'adesioni insoru a su responsàbili iscientìficu de “Sardegna Ricerche”.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags