Fogu e bentu in su territòriu de Aristanis e in Ogiàstra

Zuncheddu Sardigna Libera: non ddoi at unu pianu de interventu cordinau
26 Luglio 2021
fogu

Sa provìntzia de Aristanis e s'Ogiàstra funt sprefundadas in s'inferru. Su fogu megat a ndi papai matas, bìngias, animalis e òminis. Non ddoi at pasiu perunu po is chi funt impinnaus a ndi studai su fogu; a ddis fai de ostàculu est su bentu: primu su bentu de soli e agoa su bentu estu. Custu bisu malu chi sighit de tres diris nd'at fatu torrai a bessiri a pillu su coru de sa genti de Sardigna. Est difatis mannu meda s'agiudu chi lompit de sa genti in custus logus.

Ma cali est sa nexi chi fait nasci custu mali? Po Claudia Zuncheddu de Sardigna Libera, intre is intzimias ddoi at s'"abandonu sempri prus grai de su satu" e – aciungit - "sa pèrdida de unu controllu naturali de su territòriu".

"Sa mèngua de sa populatzioni- pretzisat Zuncheddu - non podit èssiri feti unu tema po [...] radical chic, custu arragu non si podit afrontai mancu cun sa bèndida de domus a un'euru, ni cun su sòlitu cunvegnu chi pedit limòsina e dinai a chini si guvernat".

"Cussu de su fogu - sighit sa nota de imprenta - est un'arrori chi acontessit fatuvatu e chi non bit interessu de parti de totus is istitutzionis". "Po amparai s'ambienti e is territòrius cun is comunidadis insoru, is Canadair e is àterus sustennius aèreus funt netzessàrius, ma non funt bastantis. [...] su fogu si bincit prusatotu cun òminis annestraus, chi connoscint su logu e chi funt frunius de suportus adeguaus".

© RIPRODUZIONE RISERVATA
Tags