“Mediterranea Ceramica km 0”: unu progetu sustenìbili

S'azienda de Gùspini produit gres a km 0
15 Luglio 2021
terra

Terra - Valorizai su territoriu sardu e prusatotu cussu a ingìriu de sa bidda de Gùspini cun nd'una produtzioni mastrina chi tenit is fundamentas cosa sua in nd'unu progetu sustenìbili. Est custa sa punna de “Mediterranea Ceramica km 0”, una realidadi produtiva guspinesa chi est ativa in Sardigna de bint'annus pagu prus o mancu.

Ma ita produit “Mediterranea Ceramica km 0”? Sa ceràmica prus resistenti chi s'agatat in su mercau, est a nai su gres, chi cummenti scideus serbit in su campu de s'edilìtzia. Sa cosa prus de importu, perou, no est tanti ita faint is de “Mediterranea Ceramica km 0” ma cummenti ddu faint. Difatis, totu sa produtzioni de gres chi tenit su marcu de s'azienda guspinesa est una produtzioni sustenìbili e, cummenti narat su nòmini cosa sua etotu, est una produtzioni a km 0.

mediterranea ceramicaSu progetu est sustenìbili in dògnia fasi: is matèrias primàrgias impitadas funt sardas e s'impreant respetendi s'ambienti de s'ìsula; is operaius chi traballant in azienda funt de domu (aici s'azienda donat traballu in su lofu innoia traballat); su manìgiu de is materialis si fait arresparmiendi àcua, resussa de importu mannu po totu sa Terra; dògnia refudu torrat sèmpri a intrai in sa produtzioni e custa est una cosa importanti meda, poita permitit de non nci fuliai nudda.

In prus de totu su chi eus giai nau bisòngiat po finas a aciungi ca s'acapiòngiu cun sa Sardigna est aici forti ca is disignus de is impiastras “Mediterranea Ceramica km 0” castiant a sa terra sarda e a is traditzionis suas. Est nàscia aici sa lìnia “Abitzai” chi arregordat sa tessidura, su ricamu, a sa pedra antiga e is paesagius sardus puru. “Abitzai”, difatis, est unu fueddu sardu chi s'impitat cun su sinnificau de semenai e po finas cun cussu de torrai a donai calencuna cosa a s'ambienti chi dd'at produida. Aintru de s'azienda “Mediterranea Ceramica km 0” totu custu si fait castiendi a s'edadi contemporànea.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA