Ambienti: in Casteddu nascit su parcu Nervi
Terra – At èssiri un'area birdi chi s'acarat a su mari. Un'area cun caminus pedònalis, caminus po bicicretas e caminus naturalìsticus. Un'area chi rapresentat un'esèmpiu ùnicu de s'archeologia industriali chi pertocat su tretu de su portu de Casteddu.
Su parcu est istètiu incingiau su 30 de su mesi de argiolas de Massimo Deiana, Presidenti de s'AdSP (“Autorità di Sistema Portuale”) e de su sìndigu de Casteddu Paolo Truzzu.
Is traballus fatus funt medas e funt costaus 5 millionis de eurus pagu prus o mancu.
"Su parcu de su Nervi - at pretzisau Massimo Deiana - est un'esèmpiu ùnicu de archeologia industriali" e candu at èssiri finiu totu at èssiri unu logu bellu po passai is oras lìbberas, po fai isport e po finas cultura.
Non est totu, poita su parcu at a rapresentai puru su logu po tucai a fai scampirradas naturalisticas passendi atressu de su canali "San Bartolomeo". De custu caminu, difatis, si lompit a s'oasi naturalistica de Molentàrgius, una prenda manna chi tenit unu valori istòricu e ambièntali stravanau. No est po nuddaca po amparai su logu funt prevìdius serbìtzius de netesa dedicaus e serbìtzius de mantenimentu de su birdi atentus e fitianus.
Bisòngiat a pretziasai ca su progetu est su primu passu po incarrerai unu programma prus mannu de avaloramentu de s'area industriali.
"Sa punna de s'AdSP e de su Comunu de Casteddu est de definiri is cunditzionis de impreu chi s'istrutura at a tenni in su benidori". Po ddu fai at èssiri fata una gara internatzionali chi at a depi individuai unu gestori capassu de ghiai sa cosa comenti si depit.
Non est acabbada innoi, poita su parcu Nervi at podi diventai puru su logu de innoja tucat unu serbìtziu de trasportu acuàticu chi, atressu de su Molentàrgius, podit lòmpiri in 20-25 minutus in Pauli.
Su progetu de su parcu Nervi est unu prexu mannu po su sìndigu Truzzu. Custa est "un'area – at afirmau Truzzu -, chi torrat a is casteddajus", e at sighiu narendi ca “is progetus imbenientis ant a rivalorizai su pinedu de su Siccu e ant a biri s'acumprida de su ponti ciclopedonali".
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
