Ambienti: circa po difendiri is animalis de su mari

Terra - Su Wwf at a lòmpiri in Sardigna po compidai su mari de s'ìsula e totu su chi ddoi bivit. Ddu at a fai a pitzus de una goleta. Sa circa s'at sboddiai in sa Sardigna de su cabu de giossu e is protagonistas ant èssiri is mammìferus euterus, is tostòinus, is derfinus e is canusus.

Sa punna est sa de compidai is animalis chi s'agatant in s'ambienti marinu cun istrumentus adatus, comenti dronis, idrofonus, màchinas fotogràficas e videocameras. S'impreu de custus istrumentus serbit a analizai sa distributzioni de is animalis, a nd'analizai po finas su cumportamentu e a valutai cali cunsighèntzias tenit s'impestadura in sa vida insoru.

Su progetu s'at sboddiai intra sa fini de su mesi de cabudanni e su mesi de ladàminis e at a biri su traballu de Wwf e de àterus entis connotus meda e famaus in totu su mundu. In sa goleta ddoi at èssiri puru unu team de biòlugus e etòlugus chi ant a agiornai is istudius fatus in s'àrea corant'annus fait pagu prus o mancu.

Intre is obietivus de su Wwf ddoi at puru su de cumprendi cali dannus faint su bycatch, su tràvigu de is nais, s'impestadura acùstica e sa pràstica.

Duncas custu progetu de circa in mari at a donai una manu de agiudu po pigai informatzionis asuba de un'àrea chi est ancora pagu istudiada. Seus fueddendi de informatzionis de importu mannu po sa comunidadi iscientìfica. Custa, difatis, est un'àrea chi at a podi rapresentai un'hotspot de biodiversidadi e una zona importanti de s'alimentatzioni, de sa trantzidura e de sa trubera de balenas, derfinus, tostòinus e canusus. Su progetu est aintru de sa campagna chi su Wwf at batiau cun su nòmini “GenerAzioneMare”. Unu progetu chi tenit sa punna de amparai su Mediterràneu. Si tucat de Carluforti (o de Fiumicinu po chini lompit de sa terravrimma) po curri 10 diris in mari obertu e avreguai s'echilìbriu de s'ecosistema suu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22