Ambienti: fogus e istrossa de abis

Terra – Est un'istrossa de abis foras de contu sa chi at fertu su Montiferru agoa de is fogus de su mesi de argiolas passau. Un'istrossa chi s'at a fai intendi po tempus meda e chi ferrit prusatou sa biodiversidadi de su logu. Is dannus non si podint contai de cantu funt mannus. Seus fueddendi de dannus chi ant a mudai s'echilìbriu ambientali.

A pagai su contu de custa destrossa ant èssiri animalis e abis. A contus fatus parrit chi is abiàrgius destruidus siant 500 pagu prus o mancu, mentras is abis mortas funt 30 milionis. Funt nùmerus de importu, nùmerus chi donant pentzamentus.

Su fogu si nd'est papau 20 milla ètarus de terra pagu prus o mancu, at ispèrdiu padentis, sartus, ortus e logus prantaus a matas de frutuàriu. In manera crara is efetus funt diferentis: bastat pentzai ca is ortalìtzias e sa frùtora ant tentu prus pagu dannu de is abis.

A fai connosci is nùmerus de custa destrossa est s'"Organizzazione di Produttori Apicoltori della Sardegna" de Terrantiga. A oi - pretzisat s'organizatzioni - "is dannus non si podint ponni in contu, duncas non si podint ancora nai cun pretzisioni", poita - sutalìniat su presidenti de s'organizatzioni Francesco Caboni - su chi tocat a fai est "cumprendi cali abiàrgius si funt salvaus, cali is chi ant tentu dannu e cali si funt destruiduis dessintotu".

Is dannus fatus a is abiàrgius donant pentzamentu mannu a is allevadoris de abis, ma a donai una manu de agiudu est arribbada po finas Legambiente. S'assòtziu ambientalista at difatis obertu una pàgini web po salvai is abis de Sardigna. Sa pàgini tenit sa punna de regòlliri dinai po is aziendas de su Marghine. Su campagna si lamat "Save the Queen", est a nai “salva sa reina”. Sa punna est sa de torrai a fai nàsciri is logus fertus de su fogu e de ddu fai atressu de is abis, elementus de importu mannu po sa biodiversidadi.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22