Ambienti: sighit "Lassami Neta"

Is indipendenstas de Lìberu in s'aeroportu de Su Masu po ammentai a sa genti ca s'arena si lassat in mari
17 Agosto 2021
terra

Terra - Liberu non si frimat e sighit a difèndiri s'ambienti. Unas cantu diris fait is militantis de su partidu indipendentista ghiau de Predu Predu Frantziscu Devias ant donau milli volantinus pagu prus o mancu a is turistas chi chi funt lòmpius in s'aeroportu de Su Masu.

S'atzioni in difesa de s'ambienti est acapiada a campagna natzionali “Lassami Neta” e tenit sa punna de sensibilizai e informai sa genti. Su messàgiu est su de non ndi liai s'arena e su conchillu de su mari.

Sa campagna “Lassami Neta” - ca in italianu olit nai "Lasciami Pulita" - est nàscia in su 2017 po evitai sa destrossa ambientali chi Sardus e turistas faint a is arenàrgius candu si ndi liant a domu "souvenir" chi depint abarrai innoia s'agatant. Chistionaus de: arena, conchillu, pedras e matas raras.

lassami netaCusta abitùdini mala, po is de Liberu est su resurtu de una "non connoscèntzia de su dannu chi si fait a s'ambienti" e de una non connoscètzia "de is proibitzionis chi pertocant custa pràtiga". A faci de custus duus elementus is indipendentistas ant pigau sa detzisioni de fai connòsciri is dannus chi fait chini furat a su mari e a s'arenàrgiu.

De candu at mòviu is primus passus “Lassami Neta” at fatu fueddai de sei cun is adesivus e is volantinus in is portus e in is aereportus: funt is mantessi adesivus e volantinus donaus de is ativistas etotu in totu sa Sardigna.

“Lassami Neta” - pretzisat su partidu indipendentista in is pàginis Facebook cosa sua - est una de is initziativas chi at otentu prus fama in tema de defensa ambientali". Cun is annus - sighit sa nota - sa campagna "at portau is autoridadis regionalis puru a pigai cussèntzia de sa chistioni". Sa Regioni Autònoma de Sardigna, difatis, ocannu est sa promovidora de unu spot publitzitàriu chi tenit comenti protagonistas facis famadas de su mundu de sa cultura e de s'ispetàculu.

"Est de importu mannu - sighit sa nota - ca dògnia personi fatzat sa parti cosa sua". Po ddu fai tocat a "no ndi liai arena e conchillu, ma tocat puru a imparai a chini est prus pitiu ca de mari non si furat nudda; tocat informai is amigus, is connoscentis, is turistas de cantu custa pràtiga est perigulosa e noxili po s'ambienti".

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags