Ambienti: un'ìsula impestada de is màchinas

Terra - Sa Sardigna est impestada de is màchinas puru. Difatis, funt medas is automòbilis chi faint dannu a s'ambienti. Po promòviri una tzirculatzioni sustenìbili iat a tocai a iscerai màchinas ìbridas o elètricas.

Ma cantu funt is màchinas chi circulant in s'ìsula? A cantu si ligit in su dossier de "Confartigianato Sardegna", in Sardigna s'agantant 1 millioni pagu prus o mancu de veìculus: su 40 po centu de is màchinas tenit prus de 15 annus de edadi.In Sardigna is veìculus chi tenint una motorizatzioni inferiori a s'èuro 4 funt 412milla, est a nai su 38,6 po centu de is automòbilis, mentras is chi tenint prus de 15 annus de vida funt 423milla pagu prus o mancu, est nai su 39, 5 po centu de is màchinas. Cun custus nùmerus s'ìsula s'agatat a su de seti postus intre is regionis cun nd'unu parcu màchinas bèciu meda.

Funt imbecis 4.077 is sardus chi tenint una màchina ìbrida o elètrica. Is meris de is veìculus elètricus funt 253, mentras funt 3.824 is chi viàgiant impitendi automòbilis ìbridas.

Si castiaus a is datus bessius in su 2017 agataus ca is veìculus elètricus funt aumentaus de su 65 po centu e is màchinas ìbridas de su 43,5 po centu. A cantu si narat in is pàginis de su dossier de "Confartigianato Sardegna" is provìntzias de Sardigna prus impestadas de is màchinas funt is de sa Sardigna de su cabu de giossu, innoia s'agatant s'86, 9 po centu de is automòbilis cun nd'unu motori inferiori a s'èuro 4. Is màchinas prus giòvanas funt immatriculadas in sa provìntzia de Casteddu, àrea innoia ddoi at feti su 33 po centu de is veìculus cun motori inferiori a s'èuro 4. Nùgoro, imbecis, bincit su prèmiu po su parcu màchinas prus bèciu: innoi is automòbilis chi tenint prus de 15 annus de edadi funt su 48 po centu.

Sighendi a esaminai is datus si nd'agataus po finas de un'àtera cosa: s'ìsula nosta depit traballai ancora po sa promotzioni de is veìculus chi faint prus pagu dannu a s'ambienti. De dògnia manera sa punna iat a depi mudai cun su determinu de sa Regioni Autònoma de Sardigna de finatziai 575 puntus de ricarica po chini pigat una màchina sustenìbili.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22