Isciòperu globali po su clima: is “Fridays For Future” torrant a manifestai in Tàtari e Casteddu

Terra - Su 24 de su mesi de cabudanni su movimentu "Fridays For Future” currit in agiudu a su clima e torrat a manifestai in Tàtari e in Casteddu. Impari a is de Tàtari e Casteddu s'ant s'ant a isboddiai manifestadas in totu su mundu po gherrai contra is livellus foras de contu de sa CO2. A dolu mannu sa crisi de su clima non tenit pàsiu, ddu cumprendeus candu bideus s'Europa de Tramuntana ghetada a terra de s'àcua, Siracusa cun nd'unu record europeu de 48,8°C, sa Grecia, sa Sicilia, sa Sardigna destruidas de su fogu.

Seus abituatus a intendi fueddai de destrossas in logus atesu chentza de pentzai a sa destrossa chi ferrit a nosu etotu. Su chi si tocat a bivi est curpa nostra, de sa sotziedadi nostra. Est tuchendi de custus disacatus chi po is "Fridays For Future" tocat a ponni in motu un'isciòperu globali.

Ma cali est sa punna de s'isciòperu globali? Sa punna est sa pediri a is leader de totu su mundu un'atzioni lestra in matèria de clima.

S'atopu po pigai parti a sa manifestada at èssiri a is 9 de mangianu: in Tatàri in pratza "Castello" e in Casteddu in pratza de "i Centomila".

Is chi ant a manifestai cenàbara po s'isciòperu globali de su clima pedint chi siant respetaus is acòrdius de Parigi po abarrai intru de is 1.5 gradus lassendi agoa is conseguèntzias prus grais de sa crisi climàtica.

Comenti sutalineat in dògnia logu su movimentu “Fridays For Future”, is efetus de sa crisi climàtica funt una destrossa mala.

"Agoa de ai trantziu sa COP26 (Cunferèntzia de is Natzionis Unias asuba de is mudamentus de su clima) po mori de su Covid-19, - afirmant is ativistas de “Fridays For Future” - ddoi at s'abbisòngiu mannu de fai atzionis polìticas prontas asuba de s'apretu climàticu"; est po custa arrexoni chi "non si podeus permìtiri de ispèrdiri custa ocasioni. Non fai nudda a manera polìtica est sa primu intzìmia de s'impestadura, no eus atzetai prus chi is chi guvernant su mundu sigant a impreai sa “Conference Of Parties” comenti chi fessat unu party".

Attività realizzata col contributo della Regione Sardegna - IMPRENTAS 2020-2021. LR 22/2018, art. 22