In s' "UniCa - Orto Botanico HBK2", un'atopu po fueddai de sustenibilidadi

Su seminàriu at èssiri ghiau de is circadoris e is circadoras de s'Universidadi de is Istùdius de Casteddu
21 Settembre 2021
terra

Terra - Su tema de sa sustenibilidadi est su coru de su seminàriu "La scienza per la sostenibilità", un'atopu chi s'at a isboddiai cenàbara 24 de cabudanni incumentzendi de is cincu de merì in s' “UniCa - Orto Botanico HBK2”. Ant a pigai parti a su seminàriu is circadoris e is circadoras de su cursu de dotorau in "Scienze e tecnologie della terra e dell'ambiente" de s'Universidadi de Casteddu. S'ocasioni at èssiri sa " Sharper - Notte Europea dei Ricercatori".

Po ndi cumprèndiri unu pagheddu de prus seus intraus in su giassu de "La scienza per la sostenibilità" e eus agatau tres dimandas de importu mannu, est a nai: si seis mai pedius comenti si podit costoiri s'àcua lìmpia e comenti si podit impreai comenti si depit?; ancora: si seis dimandaus comenti si podit torrai a donai vida a s'arremusulla cosa nostra?; sa de tres: comenti si podint torrai a avalorai is refudus mineràrius?

Is circadoris e is circadoras de su cursu de dotorau in “Scienze e tecnologie della terra e dell'ambiente” de s'Univerdidadi de is Istùdius de Casteddu ant a dimustrai cali est su caminu de fai po fai iscièntzia sighendi s'isvilupu sustenìbili puru.

terraIn su seminàriu s'at a fueddai de temas interessantis comenti s'amparu de su territòriu e de s'ecosistema, sa pianificatzioni e s'impreu responsàbili de is resursas chi s'agatant in su pianeta innoia biveus e po finas su riciclu de is arremusullas. Is chi ant a pigai parti a s'atopu ant a podi assìstiri a dimustratzionis, ant podi fueddai cun is espertus e iscobèrriri is tècnicas noas chi si funt isvilupendi in Casteddu etotu.

In "La scienza per la sostenibilità" is dotorandus e is dotorandas ant ammostai comenti is circas fatas agiudant s'isvilupu sustenìbili e ddu faint atressu de sa connoscèntzia, de sa valorizatzioni de su territòriu e de su respetu de s'ambienti.

Su publicu at èssiri trisinau a manera ativa e at èssiri cumbidau a contribuiri a sa dibata chi s'at a isboddiai asuba de is temas de circa.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags