Sa sustenibilidadi de "Sa Laurera"
Terra - S'agatat in Biddanoa 'e Forru, est a nai in sa regioni sarda de sa Marmidda, si lamat “Sa Laurera” e est un'azienda sustenìbili de massajus, una realidadi produtiva de interessu mannu.
“Sa Laurera” est nàscia in su mesi de arbili de 2013 de un'idea de Marianna Virdis e de su pobiddu Francesco Mascia.
Ma ita est “Sa Laurera”? Est un'azienda cualificada in masserìtzia istòrica, est a nai ca custa est una realidadi cualificada in su recùperu de is ratzas antigas de ortalìtzias e po finas de is maneras de ddas arai e de gestiri su territòriu cummenti in s'antigu.
In prus de s'amparu de sa biodiversidadi, a fai andai ainnantis su traballu ispantosu de custa azienda marmiddesa est s'amori e su respetu po s'ambienti. “Sa Laurera”, difatis, est una realidadi produtiva ecosustenìbili.
No eus acababau, poita “Sa Laurera” est un'azienda fata de unas cantu terras innoia si arant totus is ortalìtzias chi abisòngiant a una famìlia in is diversus perìodus de s'annu. Nau in pagu fueddus: is massajus de “Sa Laurera” traballant sa terra sighendi su ritmu biològicu de is matas e de is animalis. No est po nudda ca is prodotus coltivaus in s'azienda - de su trigu a su lori, a is ortalìtzias - funt bellus e licantzus.
Impari a tècnicas noas, is crasuris, is passadissus ecològicus, is tècnicas de traballu antigas funt su coru de totu su traballu fati in is terras de custa azienda sarda.
In “Sa Laurera”, candu una terra pasiat si trabbalat s'àtera. Su traballu, fatu po su prus a manu, amènguat s'impreu de is màchinas e de su gasòliu puru. Custu est un'agiudu mannu po sa filosofia de sa sustenibilididadi incarrerada de s'azienda marmiddesa; una realidadi chi no impreat sa chìmica, e chi duncas no impitat concimi e nimancu diserbu.
Forti de sa traditzioni de sa terra innoia s'agatat, “Sa Laurera” allevat ortalìtzias e matas in terras chi non funt irrigadas, poita su rispàrmiu de s'àcua, s'iscit, est un'àteru elementu de importu mannu po sa sustenibilidadi ambientali.
A.C.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
