Sostenibilidadi: su “biogas” fatu de is refudus de is animalis

Tres borsas de istùdiu a piciocus sardus
7 Settembre 2021
terra

Terra - Sa sustenibilidadi càstiat a su “biogas” fatu de is refudus de is animalis. Est unu progetu de unu benidori birdi chi torrat a impreai is refudus de is animalis.

Su protagonista de custa idea chi respetat s'ambienti est su progetu "Versoa Project". Unu progetu chi nascit de sa conca de su dipartimentu de Agraria de s'Universidadi de Tàtari e de sa "Biogas Sardegna Green", sotziedadi chi in Arcidanu est pesendi un'impiantu chi fait compost produidu de su traballu de is refudus de is animalis.

Su progetu previdit un'istùdiu preliminari asuba de su ciclu de s'atzotu e de su fòsforu. S'istùdiu tenit sa punna de mandai ainnantis unu sistema agrìculu e zootecnicu chi si torrat a ingenerai a solu. No est totu. Àteru obietivu aziendali est sa mapadura de is sutaprodotus de s'indùstria agroalimentari sarda. Su de duus obietivus est acapiau a s'acumprida de unu polu de produtzioni de ingredientis po s'indùstria chi fait musùngiu; s'at avalorai aici una parti de s'energia fata de s'azienda etotu.

Su progetu "Versoa Project" est acapiau a tres borsas de istùdiu de 8 milla eurus. Is borsas de istùdiu funt istètias bintas de tres istudiantis de Sardigna: Roberta Farci, Daniele Marceddu e Maria Francesca Caratzu.

Responsàbili iscientìficu de "Versoa Project" est su professori Ordinàriu de "Zootecnica Speciale" in su Dipartimentu de Agrària de s'Universidadi de Tàtari.

Is borsas de istùdiu funt istètias assignadas unas cantu diris fait in s'Àula Magna de s'ateneu tataresu. Ant pigau parti a sa tzerimònia su Retori Gavino Mariotti, su Proretori vicàriu Andrea Fausto Piana, s'amministradori delegau de s'azienda "Biogas Green" Andrea Massidda, su consigieri regionali e ex Sìndigu de Arcidanu Angelo Cera, su Sìndigu de Arcidanu Davide Fanari, s'Assessora regionali de su Traballu Alessandra Zedda, su responsàbili de Foresight (est a nai su fundu de investimentu chi finantziat su progetu) Francesco Maggi, su Presidenti de "Biogas Sardegna Green" e su Diretori cummertziali impiantus de sa sotziedadi Anaergia Alessandro Massone e is coordinadoris de is progetus de circa Filippo Gambella, Pier Luigi Ledda, Paola Deligios, Fabio Correddu e Alberto Atzori.

© RIPRODUZIONE RISERVATA
Tags