Una vacàntzia sustenìbili in s'Hotel “Sa Cheya” de s'Alighera

Unu logu mirìficu chi nascit de su recùperu de una terra abbadrinosa
1 Settembre 2021
terra

Terra - Est un hotel sustenìbili, si lamat “Sa Cheya” e s'agatat in su sartu de s'Alighera, in nd'una campeda bella meda chi ingìriat a sa tzitadi catalanu-sarda.

Nascit in nd'unu poderi de 5 ètarus de terra recuperaus de unu terrenu abbadrinosu, unu terrenu sanau unus cantu annus fait de is meris de s'hotel etotu. Sa punna insoru? Sa de avalorai su logu po ddu torrai a s'istòria millenària cosa sua, un'istòria importanti chi agatat cunfirma de sa mannària sua in is duus nuraghis chi s'agatant in su monti Calvia e in su campusantu nuraghinu de monti Carru, acanta de su “Relais Hotel Sa Cheya”.

S'istòria de su “Relais Hotel Sa Cheya” incumentzat cun unu traballu de bonìfica chi dd'at permìtiu de torrai su logu a una vida noa.

Est aici chi est nàsciu unu parcu bellu mannu chi aghillit ratzas meda de macra mediterrànea. Difatis funt 10 milla pagu prus o mancu is ratzas chi s'agatant in su parcu de custu s'hotel aligheresu.

terraS'architetura de s'hotel si torrat a fai a sa de is biddas de Sardigna e nascit de unu progetu chi sighit una filosofia birdi, chi castiat, duncas, a su respetu po s'ambienti. Est a nai ca po fai s'hotel etotu ant impreau sa tècnica de fàbbricu e is materialis chi s'impitant in s'edilìtzia green. No est po nudda ca su progetu s'agatat a cuncordu cun sa natura. Difatis, cun sa punna de respetai s'ambienti, su “Relais Hotel Sa Cheya” est istètiu pesau pentzendi a su rispàrmiu energèticu e sighendi tècnicas modernas de edilìtzia sustenìbili.

Atentzioni manna po sa terra, amparu de sa biodiversidadi e cosa de papai sana funt elementus de importu mannu po is meris de s'hotel, chi iscerant feti produtus a km0, produtus chi lompint de su territòriu etotu. Ortalìtzias aradas in su campu de s'hotel sighendi su mètodu de sa masserìtzia biològica, pisci piscau in mari de is piscadoris de su logu, petza otenta de bestias allevadas a manera biològica e una manera de fai sa cosa de papai sustenìbili funt is ingredientis prus bellus de is mandiaris lichitosus chi si papant in su ristoranti de s'hotel.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags