Sustenibilidadi: sa RAS frimmat sa pisca de s'arritzoni

In Sardigna non s'at a podi piscai s'arritzoni po tres annus
28 Ottobre 2021
terra

Terra – Lompit de su Consillu Regionali su determinu chi frimmat po tres annus sa pisca de s'arritzoni. Sa proposta est de “Fratelli d'Italia”, ma primu ancora sa “gherra” contra sa pisca de s'arritzoni at tentu boxi gràtzias a diversas petitzionis chi ant pediu de frimmai custu tipu de pisca.

Imoi perou sa frimmada est istitutzionali: immoi ddoi at su determinu de su Consillu regionali, chi frimmat po tres annus sa pisca de s'arritzoni. S'Àula, difatis, at aprovau s'emendamentu presentau de Francesco Mura (capugrupu de “Fratelli d'Italia”).

arritzoniA frimmai sa pisca est una lei, sa “Omnibus”, chi in s'artìculu 8 previdit chi “cun decurrètzia de sa de sessanta diris de s'intrada in vigètzia de su provedimentu, est proibiu pigai, arregòlliri, trasportai, bendiri arritzonis de mari fintzas a su 30 de su mesi de arbili de su 2024”. Tocat a nai, perou, ca po fai intrai in vigètzia sa “Omnibus” nci olint 60 diris.

Ma cali est su motivu de custu provedimentu? Su motivu s'agatat “in s'arriscu de estintzioni de sa resursa, un'arriscu causau de s'arregorta foras de contu fata in is ùrtimus dexi annus”.

“Custu provedimentu - acrarat Mura - est cumpartziu cun su sistema de is piscadoris professioneris, chi po primus si ndi funt agataus ca s'arritzoni est a arriscu de estintzioni”. Duncas, a faci de custa destrossa, su 12 de su mesi de fiàrgiu passau su grupu “Fratelli d’Italia” at presentau sa proposta insertada in sa lei 284, pròpiu sa “Omnibus”.

Cunsiderada sa frimmada e su dannu chi podit fai a is piscadoris, sa Regioni Autònoma de Sardigna at prevìdiu luegu un'indenizu de 600milla eurus po is piscadoris etotu, mentras po is annus 2022 e 2023 s'indennizu at èssiri de 1,2 milionis.

No est acabbada innoni. Is piscadoris chi bivint de is fainas acapiadas a s'arritzoni de mari, difatis, ant èssiri trisinaus in s'allichidimentu de su fundu de su mari.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags