Ambienti: Protesta po is ficus de arburada Trieste
Terra - S'adderetzu de arburada Trieste at biu s'arrennegu de is progressistas casteddajus. S'arrexoni? Su Comunu ndi olit liai is Ficus Microcarpa po ddus cambiai cun matas de pira tzinesa.
Duncas, 233 matas de Ficus Microcarpa ant èssiri liadas po ponni matas prus piticas e de ratza diferenti. Custu po s'opositzioni at èssiri s'insemia de un'efetu grai meda po sa saludi de is casteddajus e sa calidadi de s'àera. A sutalineai sa cosa est istètia Francesca Mulas, de is "Progressisti", chi at mandau interrogatzioni a sa presidèntzia de su Consillu comunali de Casteddu, impari a is collegas de su tzentrumanca casteddaju (Francesca Ghirra, Giulia Andreozzi, Marco Benucci, Rita Polo, Marzia Cilloccu, Fabrizio Marcello e Matteo Lecis Cocco-Ortu).
Su progetu de 12 milionis de eurus previdiat traballus asuba de sa retza istradali, de s'illughentu e, ancora, traballus po is camminus de is bicicretas e traballus po is sutaserbìtzius. "Sa cosa manna e mala - pretzisat Fiori - est ca custas atzionis pertocant a su birdi tzitadinu de s'arburada". Su riferimentu est pròpiu a su càmbiu de is 233 matas de Ficus Microcarpa cun matas de pira tzinesa e cun Ficus prus pitius. Po sa consillera su càmbiu de matas est difatis una cosa foras de contu: non si cumprendit poita un'operatzioni aici biu ca funt feti otu is Ficus Microcarpa chi podint fai dannu. Duncas, cali est s'arrexoni po ddus cambiai totus? Po Francesca Mulas non ddoi at un'arrexoni chi giustìficat su determinu pigau. In prus, s'issèberu de is Pyrus Chanticleer, matas chi durant pagu e tenint po finas fragu malu, si cumprendit prus pagu puru biu ca faint unu traballu contràriu a su chi faint is Ficus.
Po difendiri is matas su "Gruppo d'intervento giuridico" at promòviu una petitzioni chi pedit a su sìndigu Paolo Truzzu chi siat amparada arburada Trieste e chi siant amparadas puru is matas secularis de Ficus Microcarpa.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
