"Nicolaus": su progetu de massaria sustenìbili finantziau de "Sardegna Ricerche"

1.250.479,61 eurus po Nicolaus
17 Novembre 2021
terra

Terra - Su nòmini cosa sua est “Nicolaus” e est unu progetu de importu mannu chi aunit sa massaria sustenìbili cun sa tennologia chi tenit is fundamentas suas in su mundu de s'ICT e de s'aerospàtziu. Pròpiu su nòmini “Nicolaus”, difatis, est unu fueddu criau impitendi is primus lìteras de is fueddus ingresus “Networked Intelligent Computing with Osservation Satellites fot Precision Agriculture Unified Sensing”.

Nicolaus est finantziau de “Sardegna Ricerche”, est a nai de su tzentru de circa de sa Regione Autònoma de Sardigna chi est famau meda in totu su mundu po is cosas chi fait e chi at fatu de candu est nàsciu fintzas a oi. Su finantziamentu chi “Sardegna Ricerche” at donau po Nicolaus est de 1.250.479,61 eurus. Bisòngiat a nai, perou, ca custu dinai benit de is POR FESR 2014-2020, unu finantziamentu chi serbit po fai frutai is “Big Data” de is tancas sardas.

sardegna ricercheMa cali est sa punna de custu progetu sustenìbili? Donai cumentzu a una massaria 4.0 e otèniri produtus de primori. Un'obietivu chi depit pertocai a dògnia campu de s'economia, po finas a cuddas produtzionis chi funt prus acapiadas a su tempus colau comenti is de sa massaria etotu.

S'obietivu de Nicolaus est, perou, comenti eus giai sutalineau, fai una massaria chi depit èssiri sustenìbili, est a nai ca non depit impestai su logu e non depit produiri efetus malus po su clima. Pròpiu su clima, dd'eus potziu intendi e biri in is cidas passadas, est istètiu s'argumentu de importu analizau in sa COP26, est a nai in s'atòbiu aprontau de is Natzionis Unias po chistionai de sa crisi climatica. Sa COP26, chi est finia calincuna diri fait, at difatis biu sa partezipatzioni de is leader de is istadus de su mundu. Custu ddu pretzisaus po sutalineai ca su progetu Nicolaus nascit po fai cosas de importu, cosas chi s'insertant beni aintru de is obietivus de s'Agenza 2030.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags