Ambienti: is muntònargius serraus rapresentant unu perìgulu mannu de impestadura ambientali

De sa R.A.S. 1,7 milionis de eurus po 26 comunus sardus
17 Dicembre 2021
terra

TerraSa Regioni Autònoma de Sardigna donat 1,7 milionis de eurus po sanai is muntonàrgius de 26 comunus sardus. Is muntonàrgius, difatis, rapresentant unu perìgulu mannu de impestadura ambientali. Est po custa rexoni ca in su 2019, sa R.A.S. at aproau su “Piano regionale della bonifica delle aree inquinate”, un'istrumentu chi fissat is resussas de impitai po is bonìficas atressu de critèrius pretzisus. Tuchendi de custus critèrius sa R.A.S. donat 1.716.615 eurus a 26 comunus de Sardigna. Su dinai, de impreai po tres annus. est a nai de su 2021 a su 2023, serbit po sanai tretus de territòriu impestaus.

Ma cantu funt is muntonàrgius registraus de su “Piano regionale della bonifica delle aree inquinate”? Funt 404. Intre custus 59 funt impestaus meda, mentras 134 tenint una prioridadi de bonìfica mesana. De custus 15 giassus s'agantant in sa “Città Metropolitana” de Casteddu; 91 in provìtzia de Tàtari; 105 in sa provìntzia de su Sud Sardigna; 106 in provìntzia de Nùgoro e 87 in provìntzia de Aristanis.

Is comunus de finantziai funt istètius isceraus agoa de un'istrutòria. Intre custus ddoi at su comunu de Sa Madalena (muntonàrgiu “S. Trinità, Sasso Rosso”) chi at a pigai 200mila eurus ; su Comunu de Sueddi (muntonàrgiu Lau De Muta e Pesadroxiu) cun 80mila eurus; su Comunu de Olothene (muntonàrgiu “Serra Urbari”, Bentredda); su Comunu de Iscanu (muntonàrgiu Sa Serra); su Comunu de Masuddas (muntonàrgiu Pranu Basciu); su Comunu de Semèstene; su Comunu de Tzaramonte (muntonàrgiu Bidda Noa, Sos Codinalzos); su Comunu de Sènnaru (muntonàrgiu M. Ii Prato, Pedru Mazeddu); su Comunu de Sètimu (muntonàrgiu Montixeddu); su Comunu de Bòttida (muntonàrgiu Cuccuru Emauru); su Comunu de Sinnariolo (muntonàrgiu Castru De Priogu); su Comunu de Bàini (muntonàrgiu Zibiroi); su Comunu de Mores (muntonàrgiu Montigiu Mannu); su Comunu de Duarche (muntonàrgiu Su Padru De Fontana); su de Mòdolo (muntonàrgiu Campizolos, Sae Don Diego); su Comunu de Ardaule (muntonàrgiu Sa Noedda); su Comunu de Gonnacodina (muntonàrgiu Is Ermas); su Comunu de Bultiggjata (muntonàrgiu Riu Puddina) e su Comunu de S'Ulumedu (muntonàrgiu Su Padru, Prato Comunale). Custus comunus ant a pigai unu finantziamentu de 40mila eurus cadaunu. S'aciungint: su Comunu de Ballau (muntonàrgiu Cuccuru e’ Domu, Genna e Urci) cun 80mila eurus; su Comunu de Santu Giuanni Suergiu (muntonàrgiu Santu Milano) cun 65.500 eurus; su Comunu de Fìgari (muntonàrgiu Donnigheddu), chi at a pigai 80mila eurus; su Comunu de Loceri (muntonàrgiu Monte Tarè) cun 133mila eurus; su de Mragaxori (muntonàrgiu Cuccuru Figus) cun 90.631 eurus; su Comunu de Futei (muntonàrgiu Zinnigas, Sant’Antiogu, Bruncu Laccus, Fraighemorus e Pranu Sa Scova), chi at a pigai 120mila eurus, e su Comunu de Locusantu (muntonàrgiu “Scuola secondaria Satta”) chi nd'at a pigai 187.484 eurus.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA