Cun "Innois" sa Sardigna podit progetai unu benidori sustenìbili

Sa punna sua est sa de fai diventai su territòriu sardu unu tzentru de innovatzioni de importu
29 Dicembre 2021
terra

Terra - Est una prataforma po s’innovatzioni fata de sa “Fondazione di Sardegna”. Su nòmini cosa sua est “Innois” e progetat su benidori sustenìbili de s'ìsula.

Innois” nascit cun sa punna de fai diventai su territòriu sardu unu tzentru de innovatzioni a livellu italianu e internazionali puru. Ma comenti at a lompi a s'obietivu suu? Simpli, islarghendi sa retza de start up, tzentrus de circa e impresas chi ndi faint parti.

Sa punna de sa prataforma, difatis, est pròpriu sa de avalorai is realidadis chi s'interessant de innovatzioni e chi tenint a incuru sa tzicularidadi, su cumpartzimentu de is ideas, sa sustenibilidadi e sa divulgatzioni de connoscentzias e esperièntzias.

Ma in Sardigna comenti si podit lompi a valorai custas realidadis? Atressu de atopus e cunferèntzias chi s'ant a isboddiai asuba de temas acapiaus a sa tecnologia, atressu de camineras de sustennu a is startup e ancora atressu de ideas imprenditorialis innovativas e campagnas de sustennu a is progetus e a is modellus de impresa sustenìbilis po sa sotziedadi e po su territòriu.

terraSu traballu de “Innois” est fitianu e sena de pàsiu. Difatis sa prataforma non s'est frimada nimancu una diri de candu est cumentzada sa pandemia causada de su COVID-19. “Innois” at traballau po totus is fainas cosa sua online e at programmau po finas sa primu “Innovation School”.

Ma ta est custa “Innovation School”? S'“Innovation School” est istètia unu caminu de importu de una cida chi s'est a isboddiau in su mesi de ledàmini 2020. Custu caminu est istètiu pentzau po ndi pesai “leader” responsàbilis, po torrai a pentzai a is protzessus aziendalis a manera sustenìbili e po agiudai a ndi pesai is ideas de progetu acapiadas a sa sustenibilidadi ambientali e chi lompint finas a is giòvanus.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags