Naschet "In sa Mesa", su progetu de aprofundimentos chi pertocat a s'agrualimentare in Sardigna

Sa rubrica at a acumpangiare sos leghidores de su giornale po un'annu intreu
31 Dicembre 2021
in sa mesa

In sa Mesa - Dae oe, chenàbura 31 de su mese de idas 2021, at a incomintzare su progetu nou de IlMinuto notizie Mediterranee. Su nùmene suo est In sa Mesa. Amus isseberadu pròpiu custu tìtulu pro numenare sos aprofundimentos chi ant a pertocare a sos produtos de primore de sa traditzione culturale de s'agroalimentare in Sardigna. Amus a faeddare de produtos ispantosos, produtos chi sunt fìgios de sa terra nostra e peri de una traditzione de cultura materiale importante.

Su progetu In sa Mesa naschet cun s'impignu de èssere un'adòbiu chi at sa punna de donare un'istrumentu de aprofundimentu econòmicu, sotziale e culturale de interessu mannu a sos leghidores de su giornale nostru.

Contare una Sardigna de produtos de primore, e puru una Sardigna de cursos, cunvegnos e initziativas chi pertennent a s'agrualimentare est su chi bolemus fàghere cun custa rubrica. S'isperu nostru est su de segudare unu pùbblicu chi ischit impitare internet e est abituadu a lèghere novas in sos giornales online. Bolemus lòmpere fintzas a custos leghidores cun sa finalidade de produire una connoschèntzia noa, una connoschèntzia chi pertocat un'aspetu de interessu mannu pro s'economia, pro sa cultura e sa sotziedade sarda.

Custa, però, est una rubrica chi bolet faeddare finas de sos chi traballant sos frutos de sa terra issoro cun amore e cumpetèntzia manna. Una rubrica, duncas, chi at a rapresentare un'ocasione pro chistionare de carchi realidade produtiva importante tra sas diversas chi s'agatant in Sardigna.

In sa Mesa at èssere realizadu cun sa partetzipatzione de s'"Assessoradu de s'Istrutzione Pùblica, Benes Culturales, Informatzione, Ispetàculu e Isport" de Sa "Regione Autònoma de Sardigna".

Cun chimbe novas a sa chida, custu progetu at a acumpangiare sos leghidores de su giornale po un'annu intreu, est a nàrrere finas a su 31 de su mese de idas de su 2022.

A.C.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags