S'ateneu casteddaiu e s'impignu po sa sustenibilidadi: obertu a is universitàrius su bandu po pigai parti a sa “Green Week Academy”

Su bandu si podit ligi intrendi in su giassu de s'Universidadi de is Istùdius de Casteddu
15 Dicembre 2021
terra

TerraSi cunfirmat sèmpiri de prus s'impignu de s'Universidadi de is Istùdius de Casteddu in su campu de sa sustenibilidadi. Difatis, su 9 de su mesi de idas passau, in su giassu de s'ateneu casteddaiu est istètia pubbricada una nova asuba de sa de 11 editzionis de sa “Green Week Academy”, est a nai su Festival de s'economia birdi, o economia “green”, comenti si narat in diri de oi impitendi sa lìngua ingresa.

Custu festival s'at a tenni de su 21 a su 27 de su mesi de marzu de su 2022 e s'at isboddiai prusatotu in sa tzitadi de Parma. Sa manifestada birdi, perou, previdit po finas unu “tour” chi s'at a frimmai in unas cantu aziendas chi in Italia funt unu modellu po is chi sighint una manera de produiri sustenìbili.

terraSa nova pubbricada in su giassu de s'ateneu casteddaiu est dedicada a is istudiantis cosa sua. Sa de sa “Green Week Academy”, difatis, at a rapresentai un'ocasioni bella meda po is universitàrius de Casteddu. Poita? Poita is universitàrius ant podi pigai parti a unu bandu po binci una bussa de residèntzia intre unas cantu de cussas prevìdias de sa manifestada etotu.

Comenti si ligit in su giassu de Unica, is universitàrius ant a tenni tempus fintzas a s'ùrtima diri de s'annu po imbiai sa dimanda insoru. Ant a podi sceberai de otèniri una bussa po is ispesas de totu sa manifestada o una bussa po una parti feti de su Festival.

Is chi funt aprontendi sa manifestada birdi ant giai fatu sciri ca, si po s'emergèntzia causada de su coronavirus non ddoi funt is cunditzionis sanitàrias po fai sa “Green Week Academy” in martzu, su festival s'at a tenni in s'istadi chi enti. Is datas funt giai fissadas: o de su 7 a su 12 de su mesi de làmpadas 2022, o de su 5 a su 10 de su mesi de argiolas 2022.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

 

© RIPRODUZIONE RISERVATA
Tags